Đei nơ̆r pơma ‘lơ̆ng hơiă hlŏh truh hăm dôm bơngai tang măt, Tổng Bí thư, Kơdră  teh đak akhan, ƀlep ƀât tơbăt 101 sơnăm năr Hla ar tơroi kăch mang, bơ̆n ƀlŏk hơdơ̆r păng ‘mêm bơnê kơ Ƀok Hô, 1 ‘nu bơngai chih hla ar tơroi tôch rơgei, bơngai pơih trong pơjing Anih chih hla ar tơroi kăch mang Việt Nam.

Bơ̆n bơnê kơ rim jơhnơr bơngai chih hla ar tơroi adrol ki, mă loi jĭ hlŏh 500 ‘nu bơngai chih hla ar tơroi lôch tang ăn teh đak păng rơbâu ‘nu bơngai chih hla ar tơroi rơka vang tơgop jơhngâm, plang pơyơ̆r sĕch kar yoa tơdrong rơngei hiôk hian kơ teh đak, yoa tơdrong hiôk chơt kơ kon pơlei, yoa tơdrong jang chih hla ar tơroi Kăch mang Việt Nam.

Akhan, Hla ar tơroi athei yak hơdoi hăm dôm tơdrong jang tơm kơ teh đak lơ̆m chăl ‘nao; Tổng Bí thư, Kơdră teh đak Tô Lâm athei, hla ar tơroi vang bơ̆ jang hăm jơhngâm đon tơpăt ‘lơ̆ng: chă ƀôh trŏ tơdrong, ră roi trŏ hăm yăn âu, tơblang hơdăh trŏ tơdrong tơm, đei nơ̆r apinh trŏ trong. Tổng Bí thư, Kơdră teh đak lui hăm khul chih hla ar tơroi rơgei, nuih mơng păng jang tơnăp, hla ar tơroi kăch mang Việt Nam gô hơnơ̆ng jang đang ‘lơ̆ng hơnăp jang jĭ nơ̆r pơma đơ̆ng Đảng, Teh đak păng Kon pơlei.