Kiơ̆ roi tơbăt, dêh char Lâm Đồng dang ei đei 2.938 tơdrong jang tơmơ̆t jên jang oei đei yua, akŏp jên pơm hla ar hloh 2,1 triệu ti hlak jên. Kiơ̆ đơ̆ng dăr hơlen, đei 359 tơdrong jang tơƀơ̆p mơmat tat, tơhlăk tơhlĭn hăm akŏp jên hloh 245.000 ti hlak jên. Mă lei, truh dang ei ‘nao hơmet pơ ‘lơ̆ng pơđĭ 22 tơdrong jang lơ̆m akŏp kơsô̆ 359 tơdrong jang. Dôm tơdrong tơhlăk tơhlĭn găh lơ akŏm tơ̆ hơdrom băl trong proh hơmet ming man - bri ‘long - tơmam drăm lơ̆m teh; hla ar tơplih iŏk yua teh, bri; hiơ̆ iŏk teh; đĭ jên tơmơ̆t jang yua đơ̆ng khei ‘năr pơm hla ar pơdui dunh; hre jên. Ƀok Phạm Dũng, Kơdră Jơnŭm vei lăng Kŏng ti tơmơ̆t jên jang ŭnh hơyuh Thủy điện Cam Ly, tơbăt, anih mơdro sa tŏk bŏk tơmơ̆t jên jang 10 tơdrong jang tơ̆ Lâm Đồng. ‘Ngoăih kơ mơmat tat atŭm, anih mơdro sa oei tơhlăk kơ pơm hla ar mưh tơplih klăih song kơchư̆k jang, gơh jang hơmet pơ ‘lơ̆ng hô sơ.

“Yua đơ̆ng tơdrong jang tơgŭm ‘nao âu ki klăih song hơnăp jang ăn kơ phường, mă đơ̆ng ‘nhŏng oh tơ̆ phường kŭm tôch kơ tơgŭm, bơ̆jang kơtang mă lei yua ‘nao dêh hnang kơna bơ̆ jang hiơ̆, hloh dôm khei mă lei ưh kơ đei hơmet pơ ‘lơ̆ng đei. Truh ƀơ̆t hơmet ăn vă hơmet pơ keh, hơmet ăn kĭ ‘noh 31/1 âu ki ‘noh tơplih tơdrong gơh kĭ kơna hơnơ̆ng tơhlăk dơ̆ng”.

Tơpă yan âu ƀôh, lơ tơdrong jang hiong găh lơ khei ‘năr lăp vă jang đang dôm hơyak hơmet ming, chih tơmơ̆t dơ̆ng hla ar hô sơ yua đơ̆ng tơplih tơdrong hơgăt dăh mă gơh kĭ. Ƀơ̆t hla ar vă jê̆ pơm đang đĭ ‘noh tơdrong hơgăt ‘noh tơplih dơ̆ng, hla ar hô sơ athei pơm ming dơ̆ng đơ̆ng blŭng, pơm ăn tơdrong jang tơmơ̆t jên jang đei hiơ̆ tơ̆ hla ar đĕch.

Ƀok Hồ Văn Mười, Bơngai jang lơ̆m Trung ương Đảng, Kơdră Anih vei lăng kon pơlei kon pơlei dêh char Lâm Đồng tơbăt, dêh char hlôi pơjing 6 grŭp bơ̆jang yua đơ̆ng Phŏ Kơdră Anih vei lăng kon pơlei dêh char pơm kơdră khŭl, kơtă năm hơlen lăng rim tơdrong jang. Dêh char tŏk bŏk ƀrư̆ ƀrư̆ lăng ƀôh păng hơmet pơ ‘lơ̆ng mơmat tat ăn rim grŭp tơdrong jang.

“Dang ei hlôi hơlen lăng, hlôi lăng ƀôh rơđăh bơih, tơdrong ‘noh truh âu kơnh jĭ akŏm hơmet pơ ‘lơ̆ng. Dôm tơdrong mơmat tat, tơhlăk tơhlĭn âu mă đơ̆ng lăng băt dăh mă pơm pơ hơi, rŏ lăng hlôi oei đei 5 sơnăm dăh mă 10 sơnăm, ƀơ̆t lăp 15 sơnăm bơih, mă lei bơ̆n gô năm dar deh, ƀônh jang hơdrol hơnat jang đơ̆ng rŏng, tơdrong kiơ kăl kơ jang hơdrol ‘noh athei jang hơdrol, tam mă kăl kŭm athei jang mă lei ‘noh jang đơ̆ng rŏng. Rim anih jang, tơring pơm liơ chă đei nơ̆r pơma ‘lơ̆ng hloh, kơđeh hloh păng đei yua hloh, chă đei tơring hơmet pơ ‘lơ̆ng mơmat tat ăn anih mơdro sa lơ̆m khei ‘năr hrôih hloh”.

Dêh char Lâm Đồng tơlĕch tơdrong hơgăt jang tŏk sơnăm ‘nâu đơ̆ng 10 truh 15%, tơdrong hơmet pơ ‘lơ̆ng 359 tơdrong jang hăm hloh 245.000 ti hlak jên tơmơ̆t jang tŏk bŏk tơhlăk tơhlĭn đei băt hơdăh ‘noh jĭ hơnăp jang kăl. Ƀok Y Thanh Hà Niê Kđăm, Bơngai jang lơ̆m Trung ương Đảng, Bí thư Đảng dêh char, Kơdră Khŭl tang măt Quốc hội dêh char Lâm Đồng akhan, ƀai toán ưh khan lăp jing hơmet pơ ‘lơ̆ng rim hla ar hô sơ hơdrô̆, le đĕch mă athei hơmet pơ ‘lơ̆ng pơđĭ trong jang, pơm kơđeh khei ‘năr hơmet pơ ‘lơ̆ng hla ar, vei sơđơ̆ng kơjăp găh tơdrong gơh kĭ - vă jên jang jăh tơplih ‘lơ̆ng jing jang tŏk tơpă.

“Kŭm hăm hơmet pơ ‘lơ̆ng tơdrong pơm hla ar, dêh char vei kơjăp tơdrong jang athei tơlĕch jang trŏ luơ̆t, tơ̆ pơkăp, vei sơđơ̆ng đei yua iŏk teh, đei yua tơmơ̆t jên jang păng pơm ‘lơ̆ng đei yua ăn Teh đak, anih mơdro sa păng kon pơlei. Dêh char hôn bơnê kơ anih tơmơ̆t jên jang tơpă, hơdai khŏm hơmet pơ ‘lơ̆ng dôm bơngai bơ̆jang kiơ̆, hiơ̆ tơlĕch jang, pơdui đunh, pơm brăh brư jên jang”.

Âu ki, Phŏ Thủ tướng Nguyễn Hòa Bình kŭm hlôi đei jơ bơ̆jang hăm dêh char Lâm Đồng vă hơmet pơ ‘lơ̆ng mơmat tat, tơhlăk tơhlĭn dôm tơdrong jang tơ̆ tơring. Tơ̆ jơ bơ̆jang, Lâm Đồng athei Trung ương xet hơlen, ăn tơgop nơ̆r hơmet pơ ‘lơ̆ng 27 tơdrong jang tơm. Găh lơ tơdrong jang đei drơ̆ng ăn đơ̆ng lơ jăl jang hơdrol, dang ei tơhlăk lơ̆m tơplih trong jang găh teh, iŏk bơngai jang, chĕng hơmet teh păng găh tơdrong athei hơmet pơ ‘lơ̆ng kiơ̆ pơtôch dăr hơlen, trong jang pơtăl dơ̆ng kiơ̆ dôm tơdrong tơchơ̆t ‘nao đơ̆ng Quốc hội. Pơma pơgơ̆r tơ̆ jơ bơ̆jang, Phŏ Thủ tướng Nguyễn Hòa Bình pơma hơdăh, dôm tơdrong jang hiơ̆ ăn tơmơ̆t lơ̆m iŏk yua tŏk bŏk pơm ăn brăh brư lơ, pơm tơ jur jên jang kơ anih mơdro sa păng tơring. Ƀok athei dêh char hơmet pơ ‘lơ̆ng pơtôch dôm tơdrong jang găh kĭ ăn; hăm dôm tơdrong jang oei tơhlăk tơhlĭn, athei roi tơbăt tôm hăm Khŭl pơgơ̆r jang vă xet hơlen, hơmet pơ ‘lơ̆ng kiơ̆ tơdrong hơgăt. Pơma hơdăh tơdrong kăl hơmet pơ ‘lơ̆ng, Phŏ Thủ tướng Nguyễn Hòa Bình tơroi rơđăh:

“Đĭ đăng rim tơdrong jang iĕm roi tơbăt găh lơ hơmet pơ ‘lơ̆ng kiơ̆ tơdrong tơchơ̆t 170 păng 265 đơ̆ng Quốc hội, mă lei athei tôm 2 tơdrong. Mă mônh, hlôi đei dăr hơlen, hơlen lăng păng đei pơtôch rơđăh pơm glăi dăh ưh; tơdăh đei pơm glăi ‘noh athei sek phak kang ƀô̆. Mă 2, tơdrong jang athei đei lơ̆m hơnăn chih yua đơ̆ng Khŭl kơdră teh đak pơjing kiơ̆ athei đơ̆ng Anih tơm Chĭnh trĭ păng Quốc hội. ‘Meh mơ̆t lơ̆m hơnăn chih ‘noh athei roi tơbăt kiơ̆ Khŭl jang 751, kơsô̆ chih jô̆ athei tôm, ‘lơ̆ng”.

Lơ̆m jơhngơ̆m đon vang yak hơdai hăm tơring, athei đơ̆ng khŭl kơdră teh đak tơ̆ jơ bơ̆jang hăm dêh char Lâm Đồng mĭnh ‘măng dơ̆ng tơƀôh hơdăh khŏm hơmet pơ ‘lơ̆ng dôm hơnih tơhlăk, pơm hiôk jên jang mă lei oei vei sơđơ̆ng tơdrong kăl pơm kiơ̆ khôi luơ̆t, ưh kơ lê̆ hiong mŭk drăm Teh đak. ‘Noh kŭm jing hơyak năm ‘lơ̆ng, bơ̆jang kiơ̆ tơdrong jang hơmet ming pran kơtang, pơm hơnih tơmơ̆t jên jang rơđăh, sơđơ̆ng - vă Lâm Đồng lui ngeh jang pran, hơtŏk tơiung hrĕnh păng kơjăp lơ̆m chăl jang tŏk kơ teh đak.