Hơnơ̆ng pơgơ̆r ‘măng hop akŏm mă 10, năr ou, năr 4/11, Kuô̆k hô̆i mơ̆ng Hla bơar pơtruh ăn păng dăr lăng hơlen trong vă pơjing Khôi luơ̆t Tơ iung pơjing ming man (hơmet ming); tơdrong vă pơjing: Khôi luơ̆t hơmet ming, tơmơ̆t dơ̆ng mĭnh ƀar apăng kơ Khôi luơ̆t Groi teh păng mŭk drăm lơ̆m teh; Khôi luơ̆t hơmet ming, tơmơ̆t dơ̆ng mĭnh ƀar apăng kơ rim khôi luơ̆t lơ̆m tơdrong choh jang sa păng cham char; tơdrong vă pơjing Khôi luơ̆t vei lăng Thuê̆ (hơmet ming); Khôi luơ̆t Pơkom, tang găn brăh brư; tơdrong vă pơjing: Khôi luơ̆t Pơm kiơ̆ Tơdrong tơchơ̆t đơ̆ng Hơnih xem tơlang (hơmet ming); Khôi luơ̆t Sơkơ̆t hơdăh tư phát (hơmet ming); tơdrong vă pơjing Khôi luơ̆t hơmet ming, tơmơ̆t dơ̆ng mĭnh ƀar apăng kơ Khôi luơ̆t Tang găn hơlou, iung tơjră tang găn sa pơgơ̆m pơjĭp. Đơ̆ng rŏng ‘noh, Kuô̆k hô̆i pơma dơnuh tơ̆ Khul găh Tơdrong vă pơjing Khôi luơ̆t pơm kiơ̆ rôp gơ̆t, rôp kron păng ưh kơ ăn lĕch đơ̆ng tơring, pơlei oei; Tơdrong vă pơjing Khôi luơ̆t Pơm kiơ̆ tơdrong tơchơ̆t hơnih xek tơlang găh yoch tih (hơmet ming); Tơdrong vă pơjing Khôi luơ̆t hơmet ming, tơmơ̆t dơ̆ng mĭnh ƀar apăng kơ Khôi luơ̆t Lý lĭch tư pháp. Kơsơ̆ ou, Kuô̆k hô̆i pơma dơnuh tơ̆ Khul găh tơdrong vă pơjing Hla bơar tơchơ̆t pơtruh ăn Hop akŏm tih kơdră tang măt lơ̆m teh đak ‘măng mă XIV kơ Đảng.

Năr 3-11, tơgop nơ̆r ăn Chih akŏm Luơ̆t, hơmet tơplih minh ƀar tơdrong lơ̆m Luơ̆t Vei lăng hre kŏng, rim bơngai tang măt ăn Kuôk hô̆i pơtruh nơ̆r hơlen mă hơdah vă pơm trong hiôk ăn tơdrong jang vei lăng hre kŏng, vă teh đak hơtŏk tơ-iung; atŭm hăm noh pơjing đon lui ăn rim anih asong jang tơ̆ Việt Nam păng đon lui lơ̆m tơpôl kon pơlei

Kơdră Kuôk hô̆i Trần Thanh Mẫn ăn tơbăt, Luơ̆t Vei lăng hre kŏng đei hơmet kiơ̆ pơkăp ah hop akŏm mă 10 ou, vă pơkăp hơdoi hăm Luơ̆t Jên mong teh đak, Luơ̆t Asong pơm jang; hơtŏk tơdrong hơmet pơ-'lơ̆ng hla bar hanh chĭnh, tơgŭm hơtŏk tenh tơdrong pơm jang dôm tơdrong jang đei jên asong jang đơ̆ng teh đak đe. Mă kăl noh lơ̆m khei năr pơm jang kiơ̆ pơkăp jơnŭm pơgơ̆r tơring 2 tăl; vei sơđơ̆ng tơdrong 'lơ̆ng hơdah, kơchăng, pơm jang đei jơnei lơ̆m tơdrong jang vei lăng hre kŏng.