Đắk Lắk dang ei đei hlŏh 41.000 ha sầu riêng, lơ̆m noh đei dang 30.000 ha đei plei, plei pơyan ‘nâu dang 500.000 tân. Mă lei, lơ̆m dêh char Đắk Lắk ‘nao đei 280 kơsô̆ đei ƀơk ăn tơring pơtăm, hăm dang 7.500 ha, păng 42 kơsô̆ ƀơk ăn Anih tăh plei lơ̆m tơpu đei Trung Quốc kĭ ăn. Dang ei oei đei 165 kơsô̆ tơring pơtăm păng 66 kơsô̆ ƀơk ăn anih tăh tơmam hlôi đei pơm đang hla ar mă lei oei gô Anih vei lăng, iŏk thuê̆ tơmam Trung Quốc (GACC) set hơlen.

Kiơ̆ Anih vei lăng kon pơlei dêh char Đắk Lắk, đơ̆ng rŏng kơ dôm hla ar âu đei kĭ ăn ‘nŏh teh đei ƀơk ăn kơsô̆ pơtăm ‘nao pơm lăp dang 40% teh pơtăm ‘long đei plei bơih đĕch. Tơdrong ‘nŏh vă akhan vă jê̆ 295.000 tân sầu riêng oei đei lơ tơdrong pơmat tat găh anih tĕch mơdro.

Kŭm hăm Đắk Lắk, dôm dêh char Gia Lai, Lâm Đồng, Quảng Ngãi kŭm roi tơbăt lơ pơmat tat mưh tơlĕch jang tơdrong tơchơ̆t 38 găh kơsô̆ tơring pơtăm sầu riêng păng anih tăh hơmet. Rim tơring apĭnh jăh đei trong pơtho drơ̆ng 1 nơ̆r găh trong jang pơjao gơ̆h tĕch tơ̆ teh đak đe, hơdai hăm hơmet pơ ‘lơ̆ng tơdrong jang vei lăng hla ar chih răk đơ̆ng rŏng kơ tơdrong tơchơ̆t đei tơmơ̆t yua.

Ƀok Nguyễn Hoàng Hiệp, Phŏ Kơdră Anih tơm vei lăng Choh jang xa păng Cham char ăn tơbăt, Anih tơm tŏk bŏk tơchĕng hơlen hơmet ming Tơdrong tơchơ̆t 38 kiơ̆ nơ̆r athei đơ̆ng Thủ tướng teh đak kiơ̆ trong hơbĕch hơbal hloh; hơdai hăm chih kơsô̆ pơđĭ trong jang asong mã số tơring pơtăm păng anih tăh hơmet, tơplih pran đơ̆ng hơlen lăng hơdrol jing hơlen lăng đơ̆ng rŏng vă tơjur pơm hla ar ăn kon pơlei păng anih tĕch mơdro.

Hăm pơyan jang sầu riêng sơnăm ‘nâu, Anih tơm vei lăng Choh jang xa păng Cham char gô jang hơdai hăm dôm anih tơm, anih jang bơ̆jang hăm păih Trung Quốc vă pơtrŭt tơdrong jang asong mã số tơring pơtăm, anih tăh hơmet; hơdai hăm pơtrŭt hơtŏk tơiung tĕch tơ̆ teh đak đe sầu riêng krăl tơngiĕt. Mă lei, trong jang ‘lơ̆ng vă anih jang sầu riêng hơtŏk tơiung kơjăp oei jing pơjing đon lui đơ̆ng anih tĕch mơdro hăm pơm tơlĕch đei jang tơnăp.

Ƀok Nguyễn Hoàng Hiệp tơroi rơđăh: "‘Meh pơjing đon lui đơ̆ng anih tĕch mơdro ‘noh rim tơmam athei băt đei anih pơm tơlĕch, băt tơmam yua đơ̆ng bu pơm, trong jang thoi yơ păng mưh đei pơm glăi ‘noh athei băt đei hơnăp jang. Mưh tơdrong jang tơchă băt đei anih pơm tơlĕch đei bơ̆jang tôm, nhôn gô kŭm hăm rim tơring bơ̆jang kiơ̆ hrơ̆ch ‘lơ̆ng tơdrong ‘nâu”.