Hop akŏm pơih trư̆k tuyê̆n truh hăm dôm dêh char, plt tơter đak dơsĭ. Kiơ̆ nơ̆r tơroi đơ̆ng Anih tơm vei lăng choh jang xa păng cham char, Anih tơm hlôi tơlĕch trong dăr hơlen tơ̆ 15 tơring tơm đơ̆ng dang ei truh 'năr 9/3/2026, hăm trong jang tôch hơdăh nhen thoi EC vă dăr lăng tơ̆ dôm tơring. Atum hăm 'nŏh, dôm dêh char, plt tơter đak dơsĭ akŏm jơhngâm hơlen năng tơdrong tang găn rôp yâu ka glăi hăm IUU tơ̆ tơring, hơmet 'lơ̆ng rim tơdrong vă bơ̆ jang hăm Khul dăr lăng mă 5 đơ̆ng Anih vei lăng châu Âu. Anih tơm vei lăng choh jang xa păng cham char ăn tơbăt, rim kơmăy phần mềm pơvih ăn tơdrong dăr lăng trong ƀato năm yâu ka hlôi đei chô̆ hơmet 'lơ̆ng.

Pơma pơtôch hop akŏm, Phó Thủ tướng Trần Hồng Hà athei dôm Anih tơm, tơring tơrang hơlen năng dơ̆ng rim hla ar chih tơroi trong năm jang vă tơl tơblang ăn Anih vei lăng Châu Âu (EC). Pơma hơdăh oei pă 2 giĕng dơ̆ng Khul hơlen năng đơ̆ng Anih vei lăng Châu Âu truh, Phó Thủ tướng athei hơnơ̆ng tơlĕch jang kiơ̆ trong hơlen năng tơm mưh bơ̆ jang tang găn rôp yâu ka glăi hăm IUU, atŭm hăm ‘nŏh pơjao tơdrong jang mă hơdăh ăn dôm tơring lơ̆m teh đak, tơmât hơdai hơnăp jang đơ̆ng anih tơm, anih jang kơ pal kơ Trung ương.