Kơdră Kuô̆k hô̆i ăn tơbăt, tơdrong pôk rơih bơngai tang măt Kuô̆k hô̆i jăl 16 păng tang măt Hô̆i đŏng kon pơlei dôm jăl jang sơnăm 2026-2031 hlôi đei jơnei keh kong hăm kơsô̆ bơngai năm tah hla lơ̆m jơ̆p teh đak vă jê̆ tôm, đei truh 99,69%; ưh đei pơgơ̆r pôk rơih hơlơ̆k dơ̆ng tơ̆ rim hơnih pơgơ̆r pôk rơih ayơ lơ̆m jơ̆p teh đak. Dang ei, rim tơring pơtoi oei akŏm, hơlen hơdah vă tơroi ăn Jơnŭm pơgơ̆r pôk rơih gah tơdrong jơnei. Kiơ̆ kơ noh, gô chih hơnăn dôm bơngai đei pôk, Hơnih Pơvih pôk rơih gô chă hơlen hơdah đon bơnôh trong pơm jang kơ bơngai tang măt.

Gah tơdrong chih akŏm khôi luơ̆t jăl jang Kuô̆k hô̆i jăl 16 pơtruh ăn Hơnih tơm Chinh trĭ, kiơ̆ Kơdră Kuô̆k hô̆i, tơdrong chih akŏm Pơm jang hlôi tơrĕk kơjăp hăm tơchơ̆t jang tih lơ̆m Hla bar pơkăp Hop akŏm bơngai tang măt jơ̆p teh đak 'măng 14 kơ Đảng, atŭm hăm noh băt hơdah dôm tơchơ̆t dơnơm, trong jang păng tơdrong tơlĕch kăp gĭt đơ̆ng Hơnih tơm Chinh trĭ tơrĕk truh keh đang trong pơkăp jang păng hơtŏk tơ-iung teh đak lơ̆m jăl jang 'nao. Kơdră Kuô̆k hô̆i akhan, Kuô̆k hô̆i kăl hơlen lăng dơ̆ng vă pơm hơdah tơdrong kăp gĭt lơ̆m chih akŏm tơdrong vă jang 'noh sơkơ̆t hơdah sơnong jang keh đang trong pơm jang, khôi luơ̆t teh đak jĭ trong jang dơnơm vă hơtŏk tơ-iung teh đak; băt hơđah khôi luơ̆t athei jing jơhngơ̆m pran vă hơtŏk tơ-iung.