Ƀok Đặng Gia Duẩn, Bí thư Đảng ủy phương Ea Kao, akhan, atŭm hăm sơkơ̆t hơdăh rim tơring tơmang pơhiơ̆ kăl, Tơdrong tơchơ̆t kăl tơchơ̆t hơdăh dơ̆ng mĭnh ƀar tơring jing hơnih truh tơmang pơhiơ̆ tơm dơnơm kơ dêh char.  ‘Ngoăih kơ ‘noh, kơdră tang măt athei trong pơprŏ jang dôm tơdrong vă jang kăl tơklep kơjăp hăm kon bơngai păng tơring kơdrơ̆m, lơ̆m ou dăng hơlei ŭnh hơyuh lơ̆m teh tơ̆ 14 tơring kơdrơ̆m, adoi nhen pơtrŭt kơtang trong pơprŏ jang pơjing Cham gre păr Buôn Ma Thuột đei jing cham gre păr apŭng plĕnh teh.“Găh hơnih ming man trong hnam ‘noh nhôn đei 2 trong tơlĕch ăn mă mĭnh găh tơring kơdrơ̆m kăl pơjing dăng tơlei ŭnh hơyuh lơ̆m teh tơ̆ rim tơring kơdrơ̆m kơ dêh char. Mă ƀar ‘noh cham gre păr, hăm hơnăp kăl kơ dêh char ‘nao dang ei păng bơ̆n đei 2 cham gre păr ‘noh ĭnh athei kăl pơjing Cham gre păr Buôn Ma Thuột jing cham gre păr apŭng plĕnh teh ‘nei bơ̆n mă kĕ atŏk tơ iung kơtang”.

Đơ̆ng trong lăng tơgoăt rim tơring, ƀok Lữ Ngọc Tân, Kơdră Hơnih vei lăng Hơnih jang mŭk drăm Phú Yên, pơma hơdăh tơdrong ‘meh vă tơmơ̆t jên jang dăng tơlei ŭnh hơyuh ‘lơ̆ng găh păh Pơmơ̆t, tơgŭm ăn atŏk tơ iung jang kmăi kmŏk tơring tơter đak dơsĭ. Ƀok Tân jei hơpơi pơjing đing pơro đak dou đơ̆ng dơnŏk Bãi Gốc năm tơ̆ Tây Nguyên ‘moi kiơ̆ jih trong gre rĕnh Hơlĕch-Pơmơ̆t, vă pơm dă ƀiơ̆ tơhoach lơ kon jên jang logistics ŭnh hơyuh păng pơjing jơhngơ̆m pran tơgoăt tơring.“Hnam kmăi kmŏk pơm tơlĕch đei lơ ŭnh hơyuh păh Pơmơ̆t, păh Hơlĕch păng rim tơring tơmăn ‘meh vă đei ŭnh hơyuh tôch kơ lơ kơna dăng tơlei ŭnh hơyuh pơtruh ŭnh hơyuh ăn atŏk tơ iung hơnih jang kmăi kmŏk pơm tơlĕch tơmam drăm ‘noh tôch gĭt kăl. ‘Ngoăih găh ŭnh hơyuh ‘noh găh đing pơro đak dou yuh soh. Tơdăh bơ̆n đei tơmơ̆t jên jang vă pơlăp đing pơro đak dou yuh soh đơ̆ng păh Hơlĕch năm tơ̆ Pơmơ̆t ‘moi kiơ̆ jih trong gre rĕnh ou lei kon jên tơmơ̆t jang hăp gô tŏ sĕt ƀiơ̆. Bơ̆n trơ trơp pơlăp đing kơjung tim mă truh 150km. Kon jên tơmơ̆t jang ưh kơ gan lơ mă lei iŏk đei jơnei tih tên”.

Tơ̆ tơring, ƀok Huỳnh Ngọc Oánh, Kơ iĕng Kơdră chĕp pơgơ̆r Đảng ủy phương Tuy Hòa, pơma hơdăh trong jang tŏk hloh ƀar ‘măng jang sa iŏk đei jô̆ hơtŏ kơ kon pơlei lơ̆m dêh char jăl ‘nao. Vă iŏk đei, kiơ̆ kơ ƀok, kăl tơmơ̆t jên jang kơtang hloh dơ̆ng lơ̆m tơdrong jang pơm trong nơnăm, adoi iung jang kơtang tơdrong đei oei sa joh ayo ‘lơ̆ng rŏ - tơmang pơhiơ̆: đak dơsĭ păh Hơlĕch tơgoăt hăm groi kông păh Pơmơ̆t, pơjing đei hơyak pran kơtang găh mŭk drăm-tơpôl.“Vă iung jang jơnei dôm tơdrong đei kơ dêh char ‘noh kăl tơmơ̆t jên jang pơ đĭ tơring đak dơsĭ păng groi kông; ưh khan lăp atŏk kơtang hơnih jang kmăi kmŏk pơm tơlĕch tơmam drăm mă lei truh hloi tơdrong oei sa joh ayŏ joăt joe kiơ̆ Tơdrong tơchơ̆t lei kiơ̆ kơ ĭnh lơ lou, găh tơdrong đei pran kơtang hloh păh Hơlĕch ‘noh đak dơsĭ, tơgoăt hăm rim tơdrong vei răk tơƀăk mong oei sa joh ayŏ joăt joe ‘lơ̆ng rŏ sơ̆ ki păng tơgoăt tơƀưh hăm păh Pơmơ̆t ‘noh bri kông ‘lơ̆ng liĕm, păng găh tơdrong tơhlăk tơhlĭn kơ bơ̆n hrei ou ‘noh tơmơ̆t jên jang trong hnam, mă kăl ‘noh trong nơnăm”.

Dôm nơ̆r tơgop ou tơƀôh hơdăh jơhngơ̆m đon lăng ba tơnăp, hơpơi ‘meh vă kơtang păng kơrŭn đĭ ai pơm tơplih ‘nao, lăng truh atŏk tơ iung Dak Lăk jing hơnih tơm hơbĕch hơbal kơ tơring Tây Nguyên păng tơring hơvĕn đak Nam Trung bộ lơ̆m chăl hle.