Kô pơtho bơngai K’Ho Ka Duys hlôi 6 sơnăm tơklep kơjăp hăm Hnam trương jăl ƀar Tân Thượng, tơring hơtăih yăih Đinh Trang Thượng. Pơtho Ngữ văn tơ̆ hnam trương đei 95% hŏk tro ‘noh bơngai K’ho, kô ƀôh mĭnh tơdrong hlĭch: lơ hok tro băt đŏk, băt chih nơ̆r Yuăn mă lei ưh kơbăt đŏk, chih nơ̆r hơdrĕch hơdrung kơdih. Đơ̆ng jơhngơm đon pơngơ̆t lơ loh, sơnăm 2022, đei Khul kơdră chĕp pơgơ̆r Hnam trương tơgŭm djru, kô Ka Duys pơgơ̆r pơih lăm pơtho nơ̆r K’Ho mă blŭng tơ̆ hnam trương hăm 40 ‘nu hŏk tro lăm 7. ‘Măng mă blŭng pơtho chư, đơ̆ng rŏng ‘noh kô năm tơchă rim nghê̆ nhân lơ̆m tơring hŏk găh tôn chĭng chêng, hơsoang đơ̆ng noh pơtho dôm tơdrong ‘nou ăn hŏk tro. Kô pơtho Ka Duys tơbăt, dôm jơ hŏk ưh khan lăp tơgŭm ăn băt chă đŏk, chih nơ̆r K’ho mă oei tơgŭm ăn băt hlôh tơdrong gĭt kăl kơ tơdrong oei sa joăt joe kơ hơdrung bơ̆n. “Jĭ bơngai K’ho kiơ̆ kơ ĭnh tơdăh dang ei ưh kơ vei răk tơdrong oei sa joăt joe hơdrĕch hơdrung lei ning nai kai ning mônh kơnh gô roi năr roi hiong hiơt. Đơ̆ng dôm tơdrong jang iĕ đơ̆ng dôm boăl hŏk tro ou jei jing pla ŭnh chông trong ăn rim đe oh băt dôm tơdrong gĭt kăl kơ tơdrong oei sa joăt joe sơ̆ ki, đe oh gơh kiơ̆ dôm tơdrong hlôh vao ou đơ̆ng noh vei răk tơƀăk mong tơdrong oei sa joăt joe sơ̆ ki kơ hơdrung K’Ho”.

Tơ̆ rim hnam trương tơring kon kông kơ Lâm Đồng, lơ ƀok thây kô pơtho jei tŏk bŏk tơchă trong yak hơdoi hăm đe hŏk tro kiơ̆ rim tơdrong jang hơdăh. Kô pơtho Nguyễn Thị Hương Giang, Bơngai chĕp kơl Khul pơtho, kơ Hnam trương Jăl pêng Phan Đình Phùng, tơring Đam Rông, akhan, jơhngơ̆m đon ‘mêm kơ eng hŏk tro đei tơƀôh hơdăh đơ̆ng tơdrong hơmet ăn ‘lơ̆ng rim ƀai pơtho, tơnăp lơ̆m dôm tơdrong pơgơ̆r pơtho pơhrăm. Sơnăm hŏk ou ki rim đe oh kơ hnam trương kơ yuơ Kô Giang vei lăng hlôi iŏk đei 9 tơmam hơpăh hŏk tro hơgei hloh lơ̆m dêh char atŭm hăm 4 tơdrong tơchăr iŏk đei tơmam hơpăh STEM lơ̆m kâp hnam trương. “Ba ‘mêm kơ eng hŏk tro ‘noh ba mă gơh pơih trong ăn hŏk tro. Hăm hŏk tro tơnap tap ‘noh ưh khan lăp pơtho lơ̆m kơsơ̆p hla bơar, ba oei chông ba hŏk tro năm truh tơ̆ jih đak kroong Krông Nô vă đe oh hŏk dôm tơdrong cham char, groi teh, găh đak. Kiơ̆ kơ ĭnh, mă đơ̆ng tơnap tap truh dang yơ ‘noh kô pơtho hăm hŏk tro jei hơdrin pơtho ‘lơ̆ng păng hŏk ‘lơ̆ng hơ iă hloh”.  

Hăm dôm ƀok thây kô tơ̆ tơring tơnap tap, ‘mêm kơ eng hŏk tro ưh khan lăp lăng ba kơtang găh măt bơngai hŏk tôm dang yơ. Mă lei oei tơchă trong vă rim đe oh hoei kơ hŭt hŏk, tơgŭm ăn rim đe oh ŭnh hnam tơnap tap hơnơ̆ng năm hŏk, pơjing tơdrong hơ iă vă hŏk tro kon kông hoei kơ ‘nhrơ̆. Tơdrong mă ‘noh jei đei ƀok thây Nguyễn Quốc Huy, Bí thư Chi bộ, Kơdră chĕp pơgơ̆r Hnam trương Jăl pêng Nguyễn Trường Tộ, tơring Tân Hải, druh kiơ̆ hơnơ̆ng prăt lơ̆m 22 sơnăm pơtho pơhrăm. Ƀok thây hlôi đei 5 ‘măng iŏk đei Chiến sĩ thi đua cấp cơ sở. Hăm ƀok thây Huy, tơdrong kăl hloh ‘noh tơ iung pơjing mĭnh hnam trương mă hŏk tro ‘meh vă truh rim năr. Đơ̆ng tơdrong vei lăng, pơma sa kơ kang ƀô̆, ƀok thây kô truh tơdrong chă mơ̆ng hŏk tro tơbăt jơhngơ̆m đon jei lăng truh hnam trương ‘lơ̆ng rŏ hơbŏ nhen ngăl.“Ƀok Hồ ling lang pơtho bơ̆n găh ‘mêm kơ eng kon bơngai. Hnam trương hơnŭk hơnoa ‘noh jĭ hơnih đei jơhngơ̆m đon ‘lơ̆ng đei tơlĕch jang kiơ̆. Kang ƀô̆ vei lăng ‘noh ling lang chă mơ̆ng nơ̆r tơgop đơ̆ng ƀok thây kô pơtho. Ƀok thây kô pơtho ‘noh băt hlôh jơhngơ̆m đon đe hŏk tro. Hŏk kiơ̆ Ƀok Hô ‘noh iung jang pơjing đei mĭnh hnam trương hơtŏ hơnơ̆ng, nơ̆r pơma đei yom kiơ̆ kơjăp, ‘nou jing tơdrong gĭt kăl hloh kơ tơdrong oei sa ‘lơ̆ng kơjăp kơ hnam trương.”

Đơ̆ng tơdrong pơtho chư, pơtho tơbăt dôm tơdrong vei răk tơƀăk mong nơ̆r pơma, tơdrong oei sa joăt joe hơdrech hơdrung păng tơ iung pơjing hnam trương ‘lơ̆ng rŏ, dôm ƀok thây kô pơtho tơ̆ tơring hơtăih yăih Lâm Đồng tŏk bŏk hơngŭr pơjing đei “hơdrĕch” hơgei păng jơhngơ̆m đon lui ăn hŏk tro. Rim jơ pơtho, pơgơ̆r tơmang lăng dăh mă tơdrong lăng ba rim đe hŏk tro jei tơgop tơgŭm ăn rim đe oh đei dơ̆ng jơhngơ̆m đon ‘mêm kơ eng hưch hanh kơ hnam trương, hưch hanh kơ tơdrong oei sa joăt joe ‘lơ̆ng rŏ kơ hơdrech hơdrung păng lui kơjăp tơ̆ hơnăp kơnh.