‘Nâu jĭ hơyak hơmet ăn gĭt kăl, vei sơđơ̆ng năr kon pơlei pơm tơm đei pơgơ̆r trŏ luơ̆t, sơđơ̆ng, tơƀôh hơdăh tơdrong pơm tơm păng tơdrong đei măt đơ̆ng teh đak tơ̆ tơring đak dơsĭ, achon đak dơsĭ gĭt kăl kơ teh đak. Kiơ̆ roi tơbăt đơ̆ng khŭl kơdră chĕp kơ̆l tơring gĭt kăl Trường Sa, pơđĭ lơ̆m tơring đei 21 hơnih tăh kơ phiê̆u. Truh dang ei, tơdrong jang hơmet ăn đei tơlĕch jang hrơ̆ch, ƀlep trong jang, ƀlep luơ̆t. Anih jang tơmam drăm đei hơmet ăn tôm, ‘noh đei 22 tŏ kơthŭng tăh mong kơ phiê̆u tơm, 16 tŏ kơthŭng kơ phiê̆u tơgŭm kŭm hăm pơđĭ hla ar, hơnăn bơngai tăh hla, kơphiê̆u pôk.

Tơdrong jang pơma dơnuh, pơklep hơnăn bơngai tăh hla păng bơngai lĕch pơjei đei bơ̆jang kiơ̆ kơjăp, rơđăh. Tơdrong jang roi tơbăt đei rŭn pran, tơgŭm kang ƀô̆, khŭl lĭnh păng Kon pơlei hlôh băt gĭt kăl tơdrong ‘lơ̆ng đơ̆ng ‘măng pôk rơih. Lăp đơ̆ng rŏng hop akŏm, kơdră chĕp kơ̆l tơring gĭt kăl Trường Sa hlôi pơjao kơthŭng tăh mong kơphiê̆u, kơthe bơngai tăh hla, hla ar pôk rơih ăn kơ rim khŭl lĭnh bơ̆jang. 2 tong duk kơ Tơring 4 Lĭnh đak dơsĭ hlôi lĕch đơ̆ng tơnŏk Cam Ranh, dêh char Khánh Hòa, ba dôm khŭl bơ̆jang kŭm hăm kơ thŭng tăh mong kơphiê̆u năm tơ̆ dôm hơnih achon đak dơsĭ tơ̆ tơring gĭt kăl Trường Sa.