Năr hơtuch giĕng, lơ̆m cham hnam trưng  mầm non Bình Minh, xăh Ea Na, dêh char Đắk Lắk rơ ông nơ̆r hiơ hiĕk. Đe oh iĕ chơt hơiă đei lăng joh ayŏ kơdŏ soang, ngơ̆r pơngôi tơmam trung thu păng iŏk tơmam. Mon H’Jun Hie Ksơr, 5 sơnăm, hŏk tro lăm mâu yao tih, tơroi:

“Năr ‘nâu ĭnh chơt dêh yua kơ đei đe duch, đe ma asong ƀĕng keo ăn nhôn. Nhôn bơnê kơ đe duch, đe ma.”

Tơdrong pơgơ̆r trung thu hăm hơnăn “Rơ ông nơ̆r hiơ hiĕk - vang tơgŭm ‘mêm mơnat” yua đơ̆ng lăm Trung cấp lý luận chính trị A55A, Hnam trưng Chính trị dêh char Đắk Lắk pơgơ̆r, hlôi pơjao 210 tơpu tơmam ăn kơ hŏk tro hnam trưng. Yă Nguyễn Thị Lệ Nga, Kơdră vei lăng Hnam trưng mầm non Bình Minh roi tơbăt:

“Hŏk tro tơ̆ âu tă kơ bơngai kon kông ngăl, găh lơ ‘noh kon oh bơngai jĭ kren. Đe mon  đei tơdrong hơrih sa ŭnh hnam tôch kơ pơmat tat, dôm tơmam âu ‘noh pơlung jơhngơ̆m đon tôch kơ tih hăm kô pơtho, hŏk tro kơ hnam trưng”.

Kŭm hăm jơ năr âu mơ̆n, tơ̆ plei Tuôr B, xăh Ea Na, tơdrong jang Trung thu ăn kơ oh yua đơ̆ng Anih dăr hơlen dêh Đắk Lắk jang hơdai pơgơ̆r hlôi pơjao 75 tơpu tơmam asong ăn hơioh păng ŭnh hnam dơnuh hin.

Ưh khan lăp tơ̆ xăh Ea Na, lơ pơlei pơla tơ̆ Đắk Lắk dôm năr âu kŭm rơ ông re hơgơ̆r yă grai, hơdăh hơdrŭng ŭnh kơ đeng. Tơ̆ xăh Ea Mdroh, 300 tơpu tơmam hlôi đei pơjao ăn kơ hơioh plei kăn kư̆ kiơ̆ tơdrong jang Hơdrŭng ŭnh kơ đeng tơ̆k hơdăh tơdrong hơpơi ‘meh. Oei tơ̆ plei Cư Kŏ Êmông, Khŭl hơdruh tơdăm xăh Dang Kang jang hơdai hăm dôm kâu lak ƀô̆ ‘mêm mơnat pơgơ̆r hơsoang yă grai, pai sŭp, yuă sŏk đĕch păng asong hơƀăn ao, tơmam hŏk pơhrăm, tơmam trung thu ăn kơ vă jê̆ 700 ‘nu hơioh kơ 2 pơlei Cư Păm păng Cư Kõ Êmông. 40 tơpu tơmam yua kăl kŭm đei gơih truh dôm ŭnh hnam dơnuh hin.

Tơdrong chơt hơiă Trung thu oei truh hăm đe oh iĕ tơ̆ Hơnih vei lăng tơgŭm tơpôl păng hơioh dêh char Đắk Lắk kiơ̆ tơdrong jang Kơmăng rang khei pơnil yua đơ̆ng Anih vei lăng jang pơgang dêh char pơgơ̆r. Đe oh đei vang pơlong pơm hơdrŭng ŭnh kơ đeng, hơri hơsoang, sa bơ̆n ƀĕng păng iŏk tơmam, hŏk ƀŏng. Ƀok Nguyễn Xuân Quý, Kơdră bei lăng Anih jang, roi tơbăt:

“Sơnăm ‘nâu Anih vei lăng jang pơgang pơgơ̆r 1 tơdrong jang tơ̆ Anih vei lăng tơgŭm tơpôl dêh char Đắk Lắk păng anih kon pơlei pơjing kơdih, hăm 1,2 tơdrong jang nhen pơlong pơm hơdrŭng ŭnh kơ đeng, joh ayŏ kơdŏ soang, sa bơ̆n ƀĕng trung thu. Tơdrong jang kŭm đei 1,2 ‘nu bơngai đei jơhngơ̆m đon ‘mêm mơnat vang yak hơdai, asong dôm tơpu tơmam, hŏk ƀŏng ăn kơ hơioh dơnuh hin yak hloh pơmat tat hŏk hơgei. Kiơ̆ đơ̆ng noh ‘meh vă gô păr ang truh đĭ đăng hơioh vang yak hloh pơmat tat yak tŏk, jing kon hơlăng hŏk tro hơgei, sâu hơ lăng kơ ƀok Hô păng jing bơngai đei yua ăn tơpôl”.

Hơgơ̆r re djơ drĭng, nơ̆r hiơ hiĕk hơnul pơhle chơt hơiă hrâu hăm nơ̆r ôr tap ti chơt hơiă dôm tơdrong pơchơt, tơdrong hiôk chơt tơƀôh hơdăh tơ̆ muh măt đe oh iĕ. Oh Nguyễn Thị Minh Châu tơroi:

“Hơmet ăn trung thu ‘noh nhôn hlôi pơtâp hơri hơsoang, pơm hơdrŭng ŭnh kơ đeng, pơtâp hơsoang yă grai. Ĭnh hơiă hloh ‘noh jĭ đei lăng hơsoang yă grai, đei rim bơngai asong tơmam. Mưh truh trung thu ‘noh ĭnh iŏk đei lơ tơdrong bơngơ̆t truh đơ̆ng rim Khŭl ‘mêm mơnat, dôm bơngai tơgŭm păng đơ̆ng dôm kơdră chĕp kơ̆l, asong ăn kơ ĭnh dôm tơmam mă đơ̆ng iĕ ră mă lei hăm ĭnh ‘noh tôch kơ ‘lơ̆ng”.

Oh Nguyễn Ngọc Hân chơt hơiă tơroi:

“Rim sơnăm tơ̆ âu đe duch, đe ma hơnơ̆ng pơgơ̆r trung thu ăn nhôn, đei lơ ƀĕng keo, tơmam sa păng tơ̆k ngôi unh đeng hơnglŏng. Nhôn pơm hơmet lơ tơmam tôch hơiă, chă pơm kơdih bơ̆n unh đeng hơnglŏng hai. Nhôn kŭm pơtâp hơri hơsoang, tơdrong hơri hơsoang đơ̆ng đe ‘nhŏng, đe mŏ ‘lŏ ‘nŏh “Hơpơi kơ ‘nhŏng vih hăm Tây Bắc, oei tơdrong hơri hơsoang đơ̆ng đe oh hơioh ‘nŏh Trung Thu jur tơ̆ pơlei tơm”.

Dôm tơpu tơmam, tơdrong pơm ngôi kŭm hăm mŏ Hằng păng ma Cuội hlôi tơgŭm ăn lơ hơioh đei tơdrong hơrih sa pơmat tat dêh hlŏh tơ̆ Đắk Lắk nhen ƀôh iŏk đei jơhngơ̆m đon ‘mêm kơ eng. Ưh lăp hơnhăk ba tơdrong chơt hơiă đĕch, dôm tơdrong hơri hơsoang, ngôi pơchơt oei tơgŭm pơm hơtŏk dơ̆ng đon hơdrin vă đe oh gơ̆h yak hlŏh pơmat tat, băt chu yom, hŏk gơ̆h hơgei.