Kiơ̆ trong tơchơ̆t tŏk mŭk drăm, jăl jang 2026–2030, Dak Lăk tơlĕch ăn tŏk mŭk drăm jô̆ hơtŏ 11-11,5% lơ̆m sơnăm, akop GRDP 5 sơnăm gô iok đei vă jê̆ 700.000 ti hlak jên. Trong tơlĕch ăn rim sơnăm jei tŏk ƀar kơsô̆, đơ̆ng 10,2% sơnăm 2026 tŏk 12% lơ̆m sơnăm 2030. Tơ̆ hơnăp tơdrong pơkoel tŏk ƀar kơsô̆ lơ̆m khei ‘năr đei lơ trong jang hiơ̆ hyĭn, ƀok Lương Nguyễn Minh Triết, Bí thư Đảng dêh char Dak Lăk athei kăl đei trong jang kơtang, mă kăl lơ̆m hơmet pơ ‘lơ̆ng bơ̆ jang pơm hla bơar păng hơvơn tơmơ̆t jên jang kăl. Adoi, kăl pơjing đei trong bơ̆ jang tơgŭm djru, tơlĕch jang hrôih rim tơdrong vă jang tih, pơjing đei hơyak tŏk mŭk drăm đơ̆ng sơnăm 2026 hloi.