Đơ̆ng mĭnh hơnih rơheng kơkot, Hơnih ƀlŏk hơdơ̆r ƀô̆ đô̆i Gạc Ma hrei ou hlôi jing “hơnih kăl” pơtho tơbăt tơdrong joăt joe păng pơm ranh jơhngơ̆m đon hưch hanh hơmanh bơnê teh đak ăn lơ jơhnơr. Mĭnh sơnăm, mơjĭt rơbou ‘nu kon pơlei, kang ƀô̆, đoàn viên hơdruh tơdăm păng tơmoi đơ̆ng rim tơring lơ̆m teh đak vih tơ̆ ou soh hlôt nhang ƀlŏk hơdơ̆r ăn dôm ƀô̆ đô̆i hlôi plang ăn pham lĕch sĕch huŏng dŏng teh đak lơ̆m ‘Măng tơblăh vang đak dơsĭ Gạc Ma sơnăm 1988, vă vei lăng tơdrong pơm tơm kơdih đak dơsĭ gĭt kăl kơ Teh đak. Mŏ Nguyễn Thị Thanh Hà, bơngai jang lơ̆m Hơnih ƀlŏk hơdơ̆r Gạc Ma tơbăt, dôm năr khei Pêng, tơklep kơjăp hăm chăl sơnăm gĭt kăl ou, măt bơngai năm truh soh hlôt nhang, ƀlŏk hơdơ̆r kơ rim ƀô̆ đô̆i nuih mơng lôch dŏng teh đak roi năr roi lơ, tơƀôh hơdăh jơhngơ̆m đon ƀlŏk hơdơ̆r kơtang đơ̆ng rim jơhnơr hrei ou hăm dôm ƀô̆ đô̆i hlôi plang pham ĕch sĕch huŏng ăn đak dơsĭ pơlei pơla.“Bro ou sơ̆ lăp mĭnh groi chuơh, ‘long nhen lĕ tim mă đei. Khei năr ou ki, nhôn hlôi pơtăm dơ̆ng lơ ‘long vă pơjing đei yơ̆p. Truh dang ei dơnơm ‘long hlôi bluh vơ̆ jing ‘lơ̆ng, groi teh ou hlôi rơngơp ƀiơ̆ bơih. Tơmoi năm tơmang pơhiơ̆ tôch kơ lơ mă lei oei proh hơmet ‘lơ̆ng kơna ưh kơ đei tơdrong tơhlăk tơhlĭn yă kiơ.”

Tơ̆ ou, rim ioi nhang đei soh hlôt jĭ mĭnh nơ̆r ƀlŏk hơdơ̆r pơtruh ăn dôm bơngai kon groi teh Việt hlôi tơkơ̆l tŏk bŏk cham char. Đunh kơ ou 38 sơnăm, lơ̆m năr 14/3/1988, tơ̆ rim hơvĕn tơmo Gạc Ma, Cô Lin păng Len Đao găh Achon dơsĭ Trường Sa, dêh char Khánh Hòa, kang ƀô̆, ƀô̆ đô̆i Khul Ƀô̆ đô̆i đak dơsĭ kon pơlei Việt Nam hlôi iung tơblăh nuih mơng vă vei lăng tơdrong pơm tơ-‘ngla Teh đak.

Hrei ou, jơhngơ̆m đon ‘noh oei hơnơ̆ng đei ƀlŏk hơdơ̆r păng ranh kơtang rim ‘măng năm ngôi tơ̆ Hơnih ƀlŏk hơdơ̆r Gạc Ma. ‘Nhŏng Trần Đăng Đức, kon pơlei oei tơ̆ achon Cam Ranh, dêh char Khánh Hòa tơbăt:“ ‘Nou jĭ mĭnh tơdrong joăt kơ kŏng ty. Sơnăm ayơ nhôn jei apĭnh năm ngôi, soh hlôt nhang ƀlŏk hơdơ̆r dôm bơngai kon kơ teh đak hlôi lôch răm. Đơ̆ng ou tơbăt jơhngơ̆m đon ƀlŏk bơnê păng hơpơi ‘meh vă teh đak ling lang sơđơ̆ng, atŏk tơ iung, mă kăl ‘noh tơ̆ hơnih đak dơsĭ achon dơsĭ păng cham gre păr.”

Ƀlŏk hơdơ̆r găh Gạc Ma oei jing jơhngơm đon ƀlŏk hơdơ̆r tôch gĭt kăl kơ lơ ŭnh hnam đei bơngai lơ̆m ŭnh hnam hlôi lôch răm tơ̆ tơring đak dơsĭ. Tơdrong lôch răm kơ đe ‘nhŏng ưh khan ƀlŏk hơdơ̆r lơ̆m chăl sơnăm kơ teh đak, mă oei jing tơdrong kăl vă rim jơhnơr hrei ou hơnơ̆ng kiơ̆ yok rok jơ̆ng mĕ ƀă yă ƀok, vei lăng năng tông gei kơjăp groi teh, đak dơsĭ kơ Teh đak.

Hăm dôm kon hơ ‘lơ̆p kơ rim ƀô̆ đô̆i lôch dŏng teh đak tơ̆ Gạc Ma, jơhngơ̆m đon ƀlŏk hơdơ̆r kơ đe ƀă, đe ‘nhŏng ưh khan lăp tơdrong chăl sơnăm, mă oei jing jơhngơ̆m đon hưch hanh hơmanh bơnê păng hơnăp jang kiơ̆ yok rok jơ̆ng dơ̆ng. Lơ bơngai hlôi rơih iŏk năm pơm ƀô̆ đô̆i, hơnơ̆ng plang jơhngơ̆m đon ăn tơdrong jang vei lăng năng tông kơjăp tơdrong pơm tơm đak dơsĭ. Mŏ Trần Thị Thủy, tŏk bŏk bơ̆ jang tơ̆ Lữ đoàn 146 – Trường Sa, kon drŏ kăn Ƀô̆ đô̆i nuih mơng Trần Văn Phương tơbăt:“Jơhnơr hơrih kơ ƀă ĭnh hăm rim bơngai lơ̆m khul hlôi plang ăn pham lĕch sĕch huŏng tơ̆ tơring đak dơsĭ vă vei lăng Teh đak, vei lăng kơjăp groi teh gĭt kăl kơ Việt Nam. Kơdih ba tŏk bŏk lơ̆m chăl sơnăm mơlôh, đei hngơ̆m đon oei ranh kơtang, kơ yuơ lơ loh hơpơi ‘meh vă đei plang ăn jơhngơ̆m pran kơdih ăn tơdrong jang vei lăng Teh đak păng tơdrong pơm tơ-‘ngla đak dơsĭ, achon dơsĭ.”

Ưh khan lăp hơnih ƀlŏk hơdơ̆r kơ rim ƀô̆ đô̆i nuih mơng pran kơtang plang ăn teh đak, Hơnih ƀlŏk hơdơ̆r ƀô̆ đô̆i Gạc Ma oei jing hơnih pơtho pơhrăm jơhngơ̆m đon ‘lơ̆ng ăn lơ hơnih bơ̆ jang khul ƀô̆ đô̆i, mă kăl ‘noh kang ƀô̆, ƀô̆ đô̆i sơnăm mơlôh. Lơ hơnih jang găh Khul ƀô̆ đô̆i đak dơsĭ Kon pơlei Việt Nam ling lang pơgơ̆r ăn ƀô̆ đô̆i năm soh hlôt nhang, năm tơmang, hơlen băt tơdrong sơ̆ ki vă pơm hơtŏk ranh kơtang jơhngơ̆m đon hưch hanh hơmanh bơnê păng jơhngơ̆m pran vei lăng tơdrong pơm tơm kơdih đak dơsĭ achon dơsĭ. ‘Moi kiơ̆ rim tơdrong pơgơ̆r tơ̆ ou, rim kang ƀô̆, ƀô̆ đô̆i sa roi băt hlôh ƀôh hơdăh hloh dơ̆ng tơdrong kăp gĭt kơ rơngei hiôk hian, đơ̆ng noh hơnơ̆ng kiơ̆ yok rok jơ̆ng tơdrong joăt joe nuih mơng pran kơtang, hơdrin pơhrăm, kơchăng iung tơblăh kơtang, kơrŭn đĭ ai vei lăng kơjăp tơdrong pơm tơm kơdih đak dơsĭ, achon dơsĭ gĭt kăl kơ Teh đak. Trung tá Dương Trọng Hà, Bí thư Đoàn hơnih jang Trung đoàn 196 tơbăt:“Soh hlôt nhang, ƀlŏk hơdơ̆r, năm tơmang lăng tơ̆ Hơnih tơbăt jĭ tơdrong pơgơ̆r hơnơ̆ng kơ Trung đoàn 196. Mă kăl ‘noh hăm kang ƀô̆ ƀô̆ đô̆i ‘nao năm bơ̆ jang tơ̆ ou gô băt hloh dơ̆ng dôm tơdrong joăt joe kơ Quân đội, Quân chủng păng dôm bơngai nuih mơng pran kơtang, lôch dŏng teh dŏng đak hlôi nuih mơng iung tơblăh, plang ăn pham lĕch sĕch huŏng. Sơđơ̆ng ăn rim kang ƀô̆, ƀô̆ đô̆i pran kơjăp iăp kơtang chinh trĭ, jơhngơ̆m đon, jơhngơ̆m hưch hanh hơmanh ƀơnê păng jơhngơ̆m hơdrin đĭ ai vă hơmet pơ ‘lơ̆ng dôm tơdrong tơnap tap.”

Pêng jĭt tơhngam sơnăm hlôi kơtĕch, mă lei nơ̆r pơkăp vei kơjăp achon sơđĭ sơnăm ‘noh sơ̆ oei ling lang vang vơch lơ̆m bri kông đak dơsĭ. Đơ̆ng Hơnih ƀlŏk hơdơ̆r Gạc Ma hrei ou, jơhngơ̆m đon ‘noh hơnơ̆ng đei ranh mơ̆t lơ̆m rim jơhnơr, vă dôm ƀô̆ đô̆i bơ̆ jang tơ̆ đak dơsĭ ling lang pran kơjăp iăp kơtang, vei lăng tơdrong pơm tơm kơdih đak dơsĭ achon dơsĭ gĭt kăl kơ Teh đak.