Khul hlôi năm dăr lăng tơ̆ hơnih tăh hla kơsô̆ 38, phương Buôn Ma Thuột găh bơ̆ jang hơmet ăn hơnih jang, pơklep hla bơar hơnăn bơngai tăh hla, hơnăn dôm bơngai pơjei, pơhrăm hơdrol pơgơ̆r pôk rơih. Kiơ̆ tơbăt, hơnih tăh hla kơsô̆ 38 đei hloh 3.110 bơngai tăh hla găh koeng kơphô̆ 5 păng koeng kơphô̆ 8 vang năm tăh hla. Jơ ‘năr ou, rim tơdrong jang hơmet ăn năr pôk rơih hlôi tơlĕch jang tôm tong, ƀlep hăm tơdrong tơchơ̆t; dôm tơmam drăm, kmăi kmŏk pơvih pơvăn ăn pôk rơih hlôi hơmet ‘lơ̆ng hơ iă.

Tơ̆ ‘măng hop akŏm hăm rim kơdră bơ̆ jang Hơnih chĕp pơgơ̆r pôk rơih dêh car, yă Cao Thị Hòa An, Kơdră jang lơ̆m Trung ương Đảng, Kơ iĕng Kơdră chĕp pơgơ̆r Đảng dêh char, Kơdră chĕp pơgơ̆r Jơnŭm vei lăng kon pơlei dêh char, Kơdră chĕp pơgơ̆r Hơnih chĕp pơgơ̆r Pôk rơih dêh char Dak Lăk athei hơnơ̆ng dăr lăng, chih tơmơ̆t mă tôm tong mă ƀlep hơnăn bơngai tăh hla; atŏk kơtang pơrô̆ tơbăt hăm lơ trong jang vă pơjing đei jơ ‘năr chơt hơ iă ‘nă hal lơ̆m kon pơlei.