VOV4.Bahnar - Pă mĭnh ƀar năr ‘nŏh hlôi trŭh năr Têt Trung thu, jơ ‘năr au, tơmam drăm tĕch mơdro pơm ngôi tơgŭm ăn năr lêh tơ̆ Gia Lai tŏk bŏk rơ ông rơ ang, tơmam drăm pơm ngôi ăn đe hơ iŏh đei chă pơdă tĕch mơdro lơ kơ loăi ... mă lei pă đei ƀô̆h tơmam drăm pơm ngôi joăt joe sơ̆ ki.

Lơ mĕ ƀă hơ iŏh rơ̆ih răt ŭnh kơđeng hơdrŭng yua hăm pil vă răt ăn kon hơ ‘lơ̆p pơm ngôi pơchơt Trung thu

Kiơ̆ đơ̆ng bơngai chĭh kơtơ̆ng ang chă tơmang lăng tơ̆ rim hơnĭh tĕch mơdro tơmam drăm pơm ngôi ăn đe hơ iŏh tơ̆ trong Phan Đình Phùng, Phương Tây Sơn, pơlei tơm Pleiku dôm năr au tơmoi lŭh năm răt tơmam drăm kĕt keng. Tơmam drăm pơm ngôi Trung thu sơnăm au lơ kơ loăi, kơ jă re hlŏh pơtêng hăm sơnăm hơdrol dang 10%. Mă lei, tơ̆ rim hơnĭh tĕch mơdro nhen lĕ pă đei ƀô̆h dôm tơmam drăm pơm ngôi joăt joe sơ̆ ki. Tơngla hơnĭh tĕch mơdro Đặng Thị Thùy Dương, tơbăt, tơmam drăm tĕch hlot hlŏh ‘nŏh ŭnh kơđeng hơdrung yua pil hăm kơ jă đơ̆ng 50.000 trŭh 140.000 hlak jên 1 tŏ. Rim tơmam drăm nhen măt meo nhưă đơ̆ng 20.000 trŭh 25.000 hlak jên lơ̆m 1 tŏ; kơ̆l lân kơ jă đơ̆ng 150.000 hlak jên trŭh 1 trĭu hlak jên ...

Tơblơ̆ nơ̆r: Amazưt