Đei pơjing lơ̆m năr 06/12/1989, Khul ƀô̆ đô̆i so Việt Nam ‘nŏh mi\nh khul chĭnh trĭ-tơpôl, tang măt ăn jơhngơ̆m đon păng tơdrong đei iŏk yua ăn khul ƀô̆ đô̆i so, jĭ hơnih jang lơ̆m Mặt trận Tổ quốc Việt Nam kơ yuơ Đảng chĕp pơgơ̆r. Đơ̆ng mă pơjing truh dang ei, Khul hlôi hơnơ̆ng atŏk tơ iung kơtang, bơ̆ jang tơnăp, trŏ lăp păng jơnei.

Pơm lêh Hop akŏm đei pơgơ̆r lơ̆m hơtuch sơnăm 2022 hlôi akŏm hơlen pơtôch jang kiơ̆ Tơdrong tơchơ̆t Pơm lêh hop akŏm kơdră tang măt Khul Ƀô# đô̆i so Việt Nam jăl VI, kiơ̆ đơ̆ng nŏh tơ ƀô̆h hơdăh trong jang ‘lơ̆ng, tim mă ‘lơ̆ng, tơdrong tơm pơm ăn păng trong jang kiơ̆; sơkơ̆t hơdăh trong iung bơ̆ jang lơ̆m jăl VII, jăl jang 2022-2027. Pơm lêh hop akŏm ‘nŏh jing tơdrong pơgơ̆r chinh trĭ gĭt kăl lơ̆m tơdrong oei sa chĭnh trĭ-tơpôl kơ khul ƀô̆ đô̆i so păng kon pơlei lơ̆m tĕh đak, đơ̆ng nŏh hơnơ̆ng sơkơ̆t hơdăh hơnih dơ̆ng, hơnăp jang tĭh tên đơ̆ng Khul Ƀô̆ đô̆i so Việt Nam lơ̆m tơdrong jang tơ iung pơjing, vei lăng Tĕh đak.

Iung pơma tơ̆ Hop akŏm Tổng Bí thư Nguyễn Phú Trọng sơkơ̆t hơdăh, đơ̆ng rŏng bơ̆ jang keh đang lơ̆m rim khul ƀô̆ đô̆i, kơ triu kang ƀô̆, ƀô̆ đô̆i hlôi lĕch đơ̆ng ƀô̆ đô̆i, brŏk vih hăm pơlei pơla dăh mă năm bơ̆ jang kơ hơnih jang anai tơ̆ rim dơnŏ anih bơ̆ jang lơ̆m rim hơnih jang. Ƀô̆ đô̆i so jĭ dôm bơngai hlôi vang iung tơblăh, pơhrăm păng nuih mơng yak hlŏh ƀôm ƀrơ̆m lơ̆m rim ‘măng tơblăh vang hrang tơ ƀet, hlôi đei tơgop tih tên ăn ‘măng iung tơblăh pơm rơngei hôk hian hơdrĕch hơdrung, tơ iung pơjing păng vei lăng Tĕh đak, hrei au tŏk bŏk jing mĭnh khul tôch git kăl kơ tơpôl. Hôn bơnê dôm tơdrong jang ‘lơ̆ng đơ̆ng Khul Ƀô̆ đô̆i so Việt Nam lơ̆m khei năr au ki hlôi vang tơgop gĭt kăl vă “Tĕh đak bơ̆n tim lăh đei hơnih dơ̆ng tih tên păng lui yom kơtang đơ̆ng apŭng plenh teh nhen hrei au ", Tổng Bí thư Nguyễn Phú Trọng pơma hơdăh, Đảng păng tĕh đak hôn bơnê kơtang dôm tơdrong jang păng dôm tơdrong tơgop đơ̆ng Khul ƀô̆ đô̆i so Việt Nam hăm tơdrong jang tơ iung pơjing păng vei lăng Tĕh đak, rim đe mih ma tơgăl jing bơngai gơnang yua kơ khul kơdră chĕp pơgơ̆r đảng, khŭl kơdră păng Kon pơlei.

Pơma hơdăh, dôm sơnăm kơnh, tơdra hơdrol tơdrong lơ̆m apŭng plĕnh tĕh hơnơ̆ng oei đei tơdrong ưh sơđơ̆ng, lơ̆m tĕh đak bơ̆n jei tơ ƀơ̆p ưh tŏ sĕt tơdrong mơmat tat, tơdrong long, Tổng Bí thư Nguyễn Phú Trọng tơbăt, hăm Khul ƀô̆ đô̆i so, Pơm lêh hop akŏm ‘măng mă  XIII kơ Đảng jei hlôi tơ ƀô̆h hơdăh tơdrong jang: "Hơlêm ƀô̆ đô̆i so kiơ̆ yok rok jơ̆ng jơhngơ̆m đon, tơdrong joăt joe “Ƀô̆ đô̆i Ƀok Hô” lơ̆m tơ iung pơjing păng vei lăng năng tông Đảng, Tĕh đak, kon pơlei păng chăl xã hội chủ nghĩa, vei lăng trong jang, jơhngơ̆m đon kơ Đảng, iung tơjră phă pơrăm dôm nơ̆r hơlĕnh pơdăr, tơchă tơdrong; tơgŭm djru dih băl jang sa, tơ iung pơjing erĭh sa hiôk jơnap. Atŏk kơtang hơnăp jang đơ̆ng rim bơngai lơ̆m khul lơ̆m tơdrong pơtho tơbăt jơhngơ̆m đon ‘mêm kơ eng Tĕh đak, tơdrong joăt joe kĕch mang ăn jơhnơr mơlô̆h, tơgop lơ̆m tơ iung pơjing păng hơmet pơ ‘lơ̆ng tơdrong jang chĭnh trĭ, tơ iung pơjing Đảng păng khul jang chĭnh trĭ rơgŏh ‘lơ̆ng, pran kơjăp”, kiơ̆ jơhngơ̆m đon ‘nau, Tổng Bí thư Nguyễn Phú Trọng athei:“Khul ƀô̆ đô̆i so Việt Nam rim hơnih kăl jang ‘lơ̆ng hlŏh dơ̆ng hơnăp jang chĭnh trĭ, đei hơnăp jang tôch gĭt kăl lơ̆m pơgơ̆r, hơlêm kon pơlei jang kiơ̆ trong bơ̆ jang đơ̆ng Đảng, khôi luơ̆t Teh đak, atŏk kơtang tơgoăt tơgoăl kon pơlei, chă hơvơn dôm tơdrong đei atŏk tơ iung mŭk drăm-tơpôl, chĕp pơgơ̆r ‘lơ̆ng tơdrong erĭh sa lơ̆m pơlei pơla, atŏk kơtang rim tơdrong jang pơting dih băl ‘mêm kơ eng teh đak, jang kiơ̆ hơtŏ hơnơ̆ng, pơjing đei minh ƀơ̆r đon tơpôl vă tơgop jang keh đang rim trong tơlĕch jang, tơdrong jang chĭnh trĭ, tơpôl kơ teh đak lơ̆m chăl ‘nao. Đảng chĕp pơgơ̆r, teh đak vei lăng, Kon pơlei pơm tơm kăl đei pêng khul kơ jăp iăp kơtang kơ tơdrong jang tơ iung pơjing păng vei lăng teh đak bơ̆n.

Tổng Bí thư Nguyễn Phú Trọng athei, Khul ƀô̆ đô̆i so rim hơnih kơrŭn jơhngơ̆m vei lăng rim tơdrong jơnei kơ kĕch mang, atŏk kơtang bơ̆ jang pơtho tơbăt chĭnh trĭ, jơhngơ̆m đon, tơgŭm djru kang ƀô̆, rim bơngai lơ̆m khul băt hơdăh trong gơlong bơ̆ jang đơ̆ng Đảng, khôi luơ̆t Tĕh đak, hơnơ̆ng akŏm, tơbăt ăn rim khul kơdră đảng, kơdră chĕp pơgơ̆r tơring nơ̆r tơgop đơ̆ng khul ƀô̆ đô̆i so, đơ̆ng kon pơlei găh dôm trong atŏk tơ iung mŭk drăm-tơpôl, vei lăng sơđơ̆ng dơ̆ng kơ jăp Tĕh đak: “Khul ƀô̆ đô̆i so rim hơnih kăl iung jang ‘lơ̆ng rim trong jang tơgŭm djru đơ̆ng Tĕh đak hăm khul ƀô̆ đô̆i so, iung jang dôm tơdrong jang, rim ‘măng pơrô̆ pơrôp lơ̆m khul ƀô̆ đô̆i so mă ‘lơ̆ng; atŏk kơtang bơ̆ jang ‘lơ̆ng tơdrong jang "Ƀô̆ đô̆i so tơgŭm djru dih băl tơjur dơnuh, jang sa hơgei ". Lăng ba kơ jăp hlŏh dơ̆ng dôm tơring tơnap tap, tơring hơtăih hơtŏ, tơring kăn kư̆ kĕch mang; hơlêm rim hơnih, rim ƀô̆ đô̆i so hơdrin jang sa, mơdro sa, hơdrin pơm pơdrŏng ‘lơ̆ng liĕm; jang kiơ̆ tơdrong joăt joe “Nhă đak chăm kơtu " pơm ăn bơ̆ jang ‘mêm mơnat ƀlŏk hơdơ̆r, mĭnh tơdrong ‘lơ̆ng “Ƀô̆ đô̆i Ƀok Hô” kơ ƀô̆ đô̆i so Việt Nam”.

Tổng Bí thư Nguyễn Phú Trọng jei athei, vei lăng năng tông tơ iung pơjing Khul Ƀô̆ đô̆i so Việt Nam rơgoh ‘lơ̆ng, pran kơjăp găh chĭnh trĭ, jơhngơ̆m đon păng tơplih ‘nao kơtang vă Khul iung jang ‘lơ̆ng hơnăp jang bơ̆n, sơđơ̆ng trŏ lăp hăm rim bơngai, lăng kơ jăp trŭh tơ̆ tơring, lăng kơjăp bơ̆ jang ‘lơ̆ng, veh ver pơ ang, pơm pơ gia păng kơrŭn đĭ jơhngơ̆m vang iung jang tơ iung pơjing Đảng, tơ iung pơjing The đak păng tơdrong jang chĭnh trĭ roi năr roi rơgŏh, pran kơtang, tơklep kơ jăp hăm kon pơlei, hơmet pơ ‘lơ̆ng jơhngơ̆m lui kiơ̆, yom kiơ̆ kơtang đơ̆ng kon pơlei hăm Đảng păng Teh đak.