VOV4.Bahnar - Kơsơ̆ năr 12/4, Đảng khul Kuô̆k hô̆i bơ̆ jang hăm Dơnŏ anĭh chĕp pơgơ̆r Trung ương Hop akŏm pơtôch jang kiơ̆ Tơdrong tơchơ̆t 19 jăl XI găh hơnơ̆ng tơplĭh ‘nao trong jang, khôi luơ̆t găh groi tĕh lơ̆m khei ‘năr atŏk kơtang bơ̆ jang tơplĭh ‘nao, pơjing hơyak pran vă trŭh sơnăm 2020 tĕh đak bơ̆n đei jing tĕh đak jang kmăi kmŏk hơgei. Iung pơma tơ̆ Hop akŏm, Kơdră chĕp pơgơ̆r Kuô̆k hô̆i Vương Đình Huệ pơma hơdăh, trong tơlĕch jang kơ tơdrong jang hop akŏm pơtôch jang kiơ̆ Tơdrong tơchơ̆t 19 păng hơmet ming Khôi luơ̆t groi tĕh jơnei hlŏh dơ̆ng, adoi pơm dă ƀiơ̆ đei tơdrong tơkêng đei ƀơm trŭh groi tĕh.

Kơdră chĕp pơgơ̆r Kuô̆k hô̆i Vương Đình Huệ iung pơma tơ̆ Hop akŏm

Hop akŏm hlôi akŏm pơma dơnŭh, pơm hơdăh rim tơdrong hle kơ hla bơar chĭh tơbăt tơdrong bơ̆ jang păng trong hơmet ăn Tơchơ̆t ‘nao pơtêng hăm Tơdrong tơchơ̆t 19 ‘moi kiơ̆ chĭnh trĭ ‘nŏh Trong tơchơ̆t tơ iung pơjing tĕh đak yak trŭh Chủ nghiã xã hô̆i (tơmơ̆t ming, atŏk tơ iung sơnăm 2011), Khôi luơ̆t tơm tĕh đak sơnăm 2013, ‘moi kiơ̆ khoa hŏk, kiơ̆ trong yan au kơ rim trong tơlĕch ăn, adoi pơm hơdăh dôm tơdrong đei ƀơm trŭh đơ̆ng rim nơ̆r athei hăm tơdrong vei lăng, iŏk yua ‘lơ̆ng hơ iă groi tĕh.

Tơblơ̆ nơ̆r: Amazưt