VOV4.Bahnar - ‘Năr 14/4, Anih chĕp kơ̆l pơ gơ̆r Đảng bộ dêh char Gia Lai pơ gơ̆r Hop akŏm ‘măng mă 7 ( pơ̆ih să). Kiơ̆ hơ len lăng tơ̆ hop akŏm, tơ drong mŭk drăm - tơ pôl jăl khei mă I sơ năm 2022 tơ̆ dêh char Gia Lai đei ƀôh tơ iung ming, jang tŏk. Mă hơ dăh ‘noh, tơ drong jang tŏk akŏm mŭk drăm GRDP jô̆ pơ hlom đei hloh 7%, thu mong jên jang teh đak đei hloh 1.660 ti hlak jên, jên tĕch tơ mam tơ̆ teh đak đe jăl khei mă I đei 200 triệu USD, tŏk 25% pơ têng hăm khei ‘nâu sơ năm sơ̆.

Jơ hop akŏm Anih chĕp kơ̆l pơ gơ̆r Đảng bộ dêh char Gia Lai ‘măng mă 7

Hop akŏm drơ̆ng nơ̆r, tơ̆ hơ năp kơnh, dêh char akŏm tơ lĕch jang dôm trong jang pơm tơ drong hiôk vă tơ iung ming, hơ tŏk tơ iung mŭk drăm, vei sơ đơ̆ng tơ drong arih sa tơ pôl; khŏm hơ drin hơ met ming choh jang sa kiơ̆ trong tơ plih ‘long pơ tăm, tơ mơ̆t yua kơ măy kơ mŏk ‘nao; tŭn pran pơ jing tơ ring tơ rang ‘nao kiơ̆ trong jrŭ, đei yua; hơ tŏk loi dơ̆ng vei lăng teh; pơ trŭt hơ tŏk tơ iung kơ măy kơ mŏk, tơ gŭm anih jang mơ dro sa tŭn hrĕnh tơ drong tơ mơ̆t jên jang, hơ met ming hla ar bơ̆ jang.

Thuem: Tơ blơ̆