VOV4.Bahnar - Tơ̆ Hà Nội ‘nao pơ gơ̆r hop akŏm Anih jang kơ tĕh đak găh druh dăm Việt Nam ‘măng mă mônh. Pơ ma lơ̆m hop akŏm, Phó thủ tướng Vũ Đức Đam akhan:  “Chơt hơ iă roi tih, hơ năp jang roi tih, Anih jang kơ tĕh đak găh druh dăm Việt Nam athei tơ lĕch dôm tơ drong jang ưh lăp vă vei lăng ‘lơ̆ng ăn druh dăm đĕch mă oei vă tưk tơ iung jơ hngâm pran đơ̆ng sơ năm mơ lôh, jơ hngâm đon rơ gei, chu plang hơ kâu đơ̆ng druh dăm Việt Nam”. Lơ̆m hop akŏm âu mơ̆n, oei pơm lêh roi tơ băt Tơ drong tơ chơ̆t 282 đơ̆ng Thủ tướng tĕh đak chih hơ dăh hơ năp jang, tơ drong jang, tơ drong gơ̆h jang păng trong pơ gơ̆r jang đơ̆ng Anih jang kơ tĕh đak găh druh dăm Việt Nam.

Druh dăm Việt Nam hrei ‘nâu đei hlŏh 22,1 triu ‘nu bơ ngai, iŏk đei 22,5% kơ sô̆ kon pơ lei lơ̆m tĕh đak. Druh dăm tơ ring tơ rang iŏk đei vă jê̆ 60%, druh dăm tơ̆ tơ ring kơ drâm hlŏh 40%. Kơ sô̆ druh dăm đei tôm tơ drong jang ‘nŏh 98,7%. Năng atŭm, druh dăm sơ đơ̆ng jơ hngâm, lui ngĕh păng tơ gŭm ăn dôm trong jang đơ̆ng Đảng, tơ drong pơ gơ̆r jang tôch pran đơ̆ng Khul kơ dră tĕh đak, mă loi jĭ lui kiơ̆ trong jang tưk tơ iung ming mŭk drăm đơ̆ng Khul kơ dră teh đak ưh jor gô iŏk đei jơ nei. Lơ druh dăm đei đon adrin hŏk pơ hrăm, hơ nơ̆ng pơ tâp pơ hrăm kơ dih, adrin iung jang xa, bơ̆ jang lơ̆m tơ pôl, jang dŏng tơ gŭm, mă loi jĭ dôm tơ drong jang tơ gŭm yoa tơ drong arih xa tơ pôl, vang tang găn jĭ Covid-19, sar bar đơ̆ng tŏ ‘mi kial kơ nê̆; roi đunh roi jang kiơ̆ ‘lơ̆ng rim tơ drong ƀơm truh tơ drong jang xa, tĕch mơ dro, hŏk pơ hrăm, ngôi pơ chơt ƀât mă jĭ hơ bŭh oei đei tôch krê, đunh đai.

Jơ hop akŏm Anih jang kơ tĕh đak găh druh dăm Việt Nam ‘măng mă mônh

Tơ̆ hop akŏm Anih jang kơ tĕh đak găh Druh dăm Việt Nam ‘măng mă mônh, dôm bơ ngai tang măt akhan, sơ năm 2021, Jĭ Covid -19 ƀơm kơ nê̆ tôch dêh truh tơ̆ đe druh dăm, tơ drong hŏk pơ hrăm, arih xa, iŏk yoa ưh kơ 'lơ̆ng. Mă lei, dôm tơ drong jang đơ̆ng druh dăm đei lơ tơ drong hơ iă, druh dăm hlôh tơ ƀôh hơ dăh tơ drong tơ guăt 1 ƀơ̆r đon, minh jơ hngâm, jang tơ năp hăm Khul kơ dră tĕh đak păng tơ pôl. Găh noh dơ̆ng, dôm anih jang adrin pơ gơ̆r lơ tơ drong jang druh dăm kiơ̆ lơ trong tôch lăp; chih pơ jing dôm hla ar pơ tho luơ̆t druh dăm 2020… Kiơ̆ yă Nguyễn Thị Bích Ngọc, Phŏ Kơ dră tơm tơ lĕch nơ̆r sơ kơ̆t tơ mât jên jang, truh âu kơnh, druh dăm athei năm hơ drol, druh kiơ̆ tom chăl 'nao, athei hơ tŏk tơ drong jang hơ doi hăm apŭng plenh tĕh, tưk tơ iung tơ drong iung jang xa rơ gei:

        TĐ: “Anih tơm tơ lĕch nơ̆r sơ kơ̆t tơ mât jên jang jang hơ doi hăm dôm anih jang kơ pal, khul grŭp vă tơ gŭm, jang hơ doi kơ jăp hăm Druh druh dăm VN tơ lĕch jên tơ gŭm ăn anih tĕch mơ dro iĕ păng păh lăp. Tơ̆ hơ năp kơnh, nhôn hơ nơ̆ng tơ gŭm ăn druh dăm lơ̆m nŏh akŏm ăn tơ drong pơ tho pơ hrăm, vei lăng anih tĕch mơ dro iĕ păng păh lăp iung jang xa. Găh trong jang tŏk ăn druh dăm đơ̆ng 2021-2030, bơ̆n athei chih pơ jing tôm tơ drong hơ găt vă hơ len năng tơ drong jang đei”.

Pơ ma lơ̆m hop akŏm, Phó Thủ tướng Vũ Đức Đam akhan: Hrei ‘nâu, druh dăm păh iung tam mă tơ̆l 18 sơ năm đei đon hlôh vao tơ pôl, hlôh vao lơ ƀiơ̆ kơ dôm jơ hnơr mĕ ƀă yă ƀok adrol ki. ‘Nâu jĭ 1 lơ̆m dôm tơ drong nol đei tơ lĕch ăn Anih jang kơ tĕh đak găh druh dăm Việt Nam. Phó thủ tướng Vũ Đức Đam athei, truh âu kơnh Anih jang păng Trung ương Đoàn athei hlôh vao mă hơ dăh, pơ jing dôm tơ drong jang mă ‘lơ̆ng vă tưk tơ iung jơ hngâm pran, đon rơ gei đơ̆ng druh dăm Việt Nam lơ̆m chăl hle.

Pơ ma truh tơ drong tơ rĕk đơ̆ng Khul kơ dră tĕh đak păng Thủ tướng tĕh đak hăm druh dăm Việt Nam păng tơ drong jang druh dăm, Phó Thủ tướng Vũ Đức Đam athei dôm anih tơm, anih jang kơ pal đei ƀơm truh jang hơ doi mă kơ jăp hăm Anih jang kơ tĕh đak găh druh dăm Việt Nam păng Trung ương Đoàn tơ lĕch dôm tơ drong jang mă rơ đăh, kiơ̆ tơ drong jang đơ̆ng Khul kơ dră tĕh đak tơ lĕch.

Phó Thủ tướng Vũ Đức Đam iung pơ ma lơ̆m hop akŏm

Phó Thủ tướng Vũ Đức Đam athei: “Trong bơ̆ jang đơ̆ng druh dăm chăl hle, tơ lĕch jang hrơ̆ch ‘lơ̆ng kiơ̆ nơ̆r hơ găt ăn druh dăm việt nam, athei jang khŏm đei, hơ pơi ‘mĕh khul druh dăm năm hơ drol, bơ̆ jang, iŏk yoa kơ măy kơ mŏk tơ gŭm ăn tơ drong jang đơ̆ng khul grŭp roi đei yoa hlŏh dơ̆ng. Sơng đei lơ bơ ngai rơ gei, drŭh dăm tốt nghiệp rơ gei, tơ drong ‘nâu kăl đei jang hơ doi kơ jăp đơ̆ng khul kơ dră tơ ring hăm khul grŭp vă tơ drong jang roi đei yoa ƀiơ̆.”

Phó Thủ tướng Vũ Đức Đam hơ mĕng mưh tơ lĕch dôm tơ drong jang hơ doi hăm apŭng plenh tĕh đơ̆ng khul druh dăm bơ̆n hăm khul druh dăm dôm tĕh đak lơ̆m tơ ring păng apŭng plenh tĕh, dôm anih jang kơ pal athei vang jang hơ doi, pơ gơ̆r jang mă pran hlŏh dơ̆ng, vă tơ drong jang ‘nâu đei pơ gơ̆r jang ‘lơ̆ng kiơ̆ tơ drong tơ gŭm đơ̆ng khul kơ dră tơ ring.

Lơ̆m sơ năm 2022, Anih jang kơ tĕh đak găh druh dăm Việt Nam tơ lĕch 1,2 tơ drong jang tơm nhen: Vang tơ chĕng hơ len, tơ lĕch trong chih pơ jing tơ drong pơ gơ̆r, tơ drong tơ gŭm ăn druh dăm păng tơ drong jang druh dăm; pơ gơ̆r hop akŏm, pơ ma nuh găh druh dăm; jang hơ doi pơ lung dôm anih jang kơ pal, tơ ring tơ rang tơ lĕch jang kiơ̆ Luơ̆t druh dăm sơ năm 2020, dôm hla ar chih pơ tho jang kiơ̆ luơ̆t druh dăm sơ năm 2020, Trong vă jang atŏk tơ iung druh dăm Việt Nam đơ̆ng 2021-2030; Pơ gơ̆r dăr hơ len, set lăng mư̆h bơ̆ jang kiơ̆ tơ drong tơ gŭm, khôi luơ̆t hăm druh dăm păh iung đơ̆ng 16 sơ năm truh hơ la kơ 18 sơ năm păng 1,2 tơ drong jang nai hai; Pơ gơ̆r jang tơ bôl đơ̆ng tĕh đak găh đe druh dăm.

Dơ̆ng: Tơ blơ̆