VOV4.Bahnar - Tơ̆ Hà Nội ‘nao pơ gơ̆r Hop akŏm Anih jang mơ dro sa Việt Nam (VBF) rim sơ năm hăm hơ năn "Tơ iung ming dơ̆ng mŭk drăm păng hơ tŏk tơ iung tơ drong tĕch mơ dro lơ̆m khei ‘năr oei sa sơ đơ̆ng hmă ‘nao”. Tơ̆ hop akŏm, rim khŭl jang mơ dro sa teh đak đe adoi lăng ‘lơ̆ng dôm tơ drong hơ drin păng jơ nei ‘lơ̆ng lơ̆m sơ năm 2021, ƀôh hơ iă găh hơ mĕng pơ̆ih ‘măng, tơ iung ming dơ̆ng păng hơ tŏk tơ iung kơ Việt Nam, hăm tơ drong chĕp kơ̆l kơ jăp, dôm nơ̆r pơ kăp pran kơ tang đơ̆ng kơ dră chĕp kơ̆l Đảng, teh đak păng tơ drong tơ goăt 1 jơ hngơ̆m đon kơ jăp đơ̆ng kon pơ lei.

Jơ hop akŏm

Hop akŏm jing tơ drong hiôk vă tơ pôl jang mơ dro sa tơ gop nơ̆r, tơ lĕch dôm trong jang vă tơ lĕch Tơ chơ̆t kơ sô̆ 11 đơ̆ng Khŭl kơ dră teh đak găh Tơ drong jang tơ iung ming dơ̆ng păng hơ tŏk tơ iung mŭk drăm - tơ pôl; hơ dai hăm ‘noh, băt hơ dăh hơ năp jang đơ̆ng rim anih jang vei lăng teh đak păng tơ pôl jang mơ dro sa lơ̆m tơ drong hơ met ming anih tơ mơ̆t jên jang tĕch mơ dro, pơ trŭt hơ tŏk tơ iung tơ ring jang mŭk drăm kơ dih păng tơ gop ‘lơ̆ng lơ̆m tơ drong hơ tŏk tơ iung kơ jăp đơ̆ng Việt Nam.

Thuem: Tơ blơ̆