VOV4.Bahnar - ‘Năr 20/9, tơ̆ An Giang pơ gơ̆r Hop akŏm apŭng plenh tĕh pơ jing trong sơ lam Việt Nam – Campuchia rơ ngei, tơ bôl, jang hơ doi vang tŏk ‘lơ̆ng ‘măng mă 6 sơ năm 2022. Pơ ma ƀât blŭng hop akŏm, ƀok Lê Tiến Châu, Phŏ Kơ dră pơm hloi Tổng Thư ký Anih Trung ương MTTQVN pơ ma hơ dăh, đơ̆ng rŏng hlŏh 5 sơ năm kĭ Tơ drong tơ chơ̆t atŭm đơ̆ng Hop akŏm apŭng plenh tĕh găh pơ jing trong sơ lam rơ ngei, tơ bôl Việt Nam - Campuchia, dôm tơ drong đei tơ lĕch jang roi đunh roi lơ tơ̆ jơ̆p tơ ring, đei yoa tơ pă, mă loi ‘nŏh tơ̆ dôm dêh char đei trong sơ lam atŭm, pơm lăp hăm tơ drong ‘mĕh vă đơ̆ng kon pơ lei 2 tĕh đak.

Anih  Trung ương Mặt trận Tổ quốc Việt Nam Khul jang kơ tĕh đak Mặt trận Tơ guăt ƀơ̆r đon atŏk tơ iung Campuchia kĭ pơ kăp tơ drong Tơ chơ̆t atŭm ‘măng mă 6

Tơ̆ hop akŏm âu, dôm bơ ngai tang măt vang pơ ma nuh, hơ len năng dôm tơ drong iŏk đei mưh bơ̆ jang kiơ̆ tơ drong Tơ chơ̆t atŭm đơ̆ng Hop akŏm mă 5, tơ gop nơ̆r ăn “Hla ar chih Tơ chơ̆t atŭm đơ̆ng Hop akŏm apŭng plenh tĕh pơ jing trong sơ lam Việt Nam - Campuchia rơ ngei, tơ bôl, jang hơ doi vang jang tŏk ‘lơ̆ng ‘măng mă 6, sơ năm 2022” atŭm hăm ‘nŏh, tơ lĕch lơ trong tơ plih ‘nao găh tơ drong jang vă pơm hơ tŏk tơ drong đei yoa đơ̆ng jang hơ doi kơ 2 păh tơ̆ hơ năp kơnh.

Dơ̆ng: Tơ blơ̆