VOV4.Bahnar - Pơ gê ‘năr 11/2, Anih tơm jang tơ bôl Việt Nam pơ gơ̆r Hop akŏm  ASEAN găh tơ mơ̆t hơ dai tơ drong jang kơ Drŏ kăn, Rơ ngei păng Sơ đơ̆ng lơ̆m dôm tơ drong jang tơm tơ pôl ASEAN kiơ̆ trong kơ tă hơ dai hăm trực tuyến. ‘Nâu jĭ tơ drong jang gĭt kăl vă pơ tăl dôm tơ drong hơ drin pơ trŭt tơ drong jang kơ Drŏ kăn, Rơ ngei, Sơ đơ̆ng (WPS) lơ̆m ASEAN kơ Việt Nam đơ̆ng jăl jang pơm Kơ dră ASEAN 2020. Pơ ma pơ gơ̆r blŭng Hop akŏm, Phŏ kơ dră Anih tơm jang tơ bôl Nguyễn Minh Vũ pơ ma hơ dăh, Việt Nam hlôi đei lơ tơ gop ‘lơ̆ng vă tŭn pran tơ lĕch jang tơ drong jang găh Drŏ kăn, Rơ ngei, păng sơ đơ̆ng (WPS) lơ̆m ASEAN, mă loi ‘noh lơ̆m jăl jang pơm kơ dră ASEAN 2020. Hop akŏm ‘măng âu jĭ tơ drong pơ tăl rim tơ drong hơ drin đơ̆ng Việt Nam yak truh pơ jing păng jang kiơ̆ ‘lơ̆ng dôm trong jang vei sơ đơ̆ng tơ drong pơm tơm đơ̆ng drŏ kăn, pơm tơ drong hiôk ăn drŏ kăn vang jang lơ̆m dôm tơ drong tơ lĕch tơ drong tơ chơ̆t, hơ tŏk hơ năp jang lơ̆m hơ met pơ ‘lơ̆ng dôm tơ drong ưh kơ pŭn ai păng long nol tơ hli truh tơ drong rơ ngei kơ jăp kơ tơ ring. ‘Moi kiơ̆ Hop akŏm, rim bơ ngai tang măt hơ mĕng ASEAN gô tơ chă đei hơ yak năm pơ tăl dơ̆ng vă pơ jing Trong tơ lĕch bơ̆ jang tơ ring găh Drŏ kăn, Rơ ngei păng Sơ đơ̆ng (RAP) hăm tơ drong tơm, bơ̆ jang hơ dăh ‘lơ̆ng.

Thuem: Tơ blơ̆