VOV4.Bahnar - Kiơ̆ trong vă jang, Hop akŏm bơ ngai tang măt Khul druh dăm CS Hồ Chí Minh kơ Khul linh ‘măng mă X vă pơ gơ̆r lơ̆m ‘năr 11 păng 12/10, tơ̆ anih tơm Hà Nội, hăm tơ drong vang akŏm đơ̆ng 450 ‘nu bơ ngai tang măt. 

Hop akŏm bơ ngai tang măt Khul druh dăm CS Hồ Chí Minh kơ Khul linh ‘măng mă 10 vă hơ len năng rim tơ drong jang đei đơ̆ng tơ drong jang đoàn păng tơ drong jang druh dăm khul linh 5 sơ năm (2017-2022); chih hơ dăh trong jang, tơ drong vă jang đơ̆ng đoàn păng khul druh dăm Khul linh lơ̆m 5 sơ năm (2022-2027); pơ tôch păng hơ păh tơ mam ăn dôm khul grŭp, rim bơ ngai jang rơ gei, iŏk đei jơ nei ‘lơ̆ng mưh pơ gơ̆r, bơ̆ jang tơ drong jang "Druh dăm khul linh pơ tâp pơ hrăm jơ hngâm đon, tơ drong rơ gei, hơ nơ̆ng yak hơ drol, khŏm iŏk đei jơ nei" đơ̆ng 2017-2022 păng tơ lĕch tơ drong pơ jei băl đơ̆ng 2022-2027.

Hop akŏm vă pơ gơ̆r tơ gop nơ̆r ăn dôm hla ar chih kăl đơ̆ng Khul kơ dră chĕp kơ̆l Trung ương Đoàn jăl 11 tơ roi lơ̆m Hop akŏm bơ ngai tang măt lơ̆m tĕh đak kơ Khul druh dăm CS Hồ Chí Minh ‘măng mă 12; pôk rơih bơ ngai tang măt ăn druh dăm khul linh năm Hop akŏm bơ ngai tang măt lơ̆m tĕh đak kơ Khul druh dăm CS Hồ Chí Minh ‘măng mă 12, jăl jang đơ̆ng 2022-2027.

VOV/Dơ̆ng tơ blơ̆