5 sơnăm âu ki, mă đơ̆ng tơƀâp lơ mơmat tat yoa đơ̆ng jĭ Covid-19, mă lei dôm tơdrong jang lơ̆m Khul bơngai măt tol Việt Nam tơtă jang đei dôm tơdrong hơgăt đei tơlĕch ngăl, tưk tơiung hơnăp đơ̆ng Hnam atŭm kơ hlŏh 74 rơbâu ‘nu bơngai jang.

Jăl jang 2022-2027, Khul bơngai măt tol Việt Nam hơnơ̆ng hơtŏk tơdrong dăr lăng, pơma tơblang, tơlĕch nơ̆r apinh hăm Đảng, tĕh đak găh dôm tơdrong tơgŭm ƀơm truh bơngai măt tol, kơmlo jo jăn; pơih xă trong jang xa, chă tơdrong jang sơđơ̆ng, pơm hơtŏk tơdrong arih xa ăn bơngai măt tol.

Vang truh akŏm păng pơma lơ̆m hop akŏm, Kơ dră Anih krao hơvơn kon pơlei kơ Trung ương Bùi Thị Minh Hoài athei rim khul grŭp tơ̆ jơ̆p tơring hơnơ̆ng tơlĕch jang kiơ̆ dôm trong jang, tơdrong tơgŭm đơ̆ng Đảng păng tĕh đak hăm bơngai măt tol; tơlĕch trong pơtho chư, pơtho tơdrong jang, pơm hơtŏk đon hlôh vao ăn kăn ƀô̆, bơngai jang. Kăl loi, athei tơrĕk hlŏh dơ̆ng truh rim Khul tơ̆ tơring groi kông, tơring hơtăih hơtŏ, mơmat tat.