VOV4. Bahnar - Pơgê năr 11/5, tơ̆ Hà Nội, pơgơ̆r hop akŏm “Cham char mạng păng tơdrong jang vei lăng jơhngơ̆m đon erĭh sa kơ hơdrŭh tơdăm”. Hop akŏm tơgoăt pơdăh kơtă trŭh 63 hơnĭh pơgơ̆r kơ rim dêh char, pơlei tơm lơ̆m tĕh đak.

Rup hop akŏm

Tơ̆ Hop akŏm, rim kơdră tang măt akŏm lăng hơlen găh tơdrong đei ƀơm trŭh đơ̆ng cham char mạng, rim tơdrong jang klŏh klĕch tĕh đak hăm tơdrong jang vei lăng jơhngơ̆m đon erĭh sa lơ̆m chăl hle. Iung pơma tơ̆ Hop akŏm, Kơdră chĕp pơgơ̆r Ban Tuyên giáo Trung ương Nguyễn Trọng Nghĩa athei rim Hơnĭh Đoàn kăl pơgĕnh kơtang dôm tơdrong rơvơn kơ cham char mạng, lơ̆m khei ‘năr tơplĭh kơsô̆ vă atŏk jơhngơ̆m đon hlô̆h vao ăn hơdrŭh tơdăm găh tơdrong joăt joe sơ̆ ki, dôm tơdrong oei sa ‘lơ̆ng rŏ hơbŏ nhen kơ hơdrĕch hơdrung nhen hơnĭh dơ̆ng, tơdrong kăl kơ oei sa jŏh ayŏ hăm khei ‘năr atŏk tơ iung tĕh đak. Khŭl Đoàn kăl akŏm chă tơchĕng hơlen, pơjing đei rim trong jang tơgŭm djru hơdrŭh tơdăm pơjing tơdrong jang tơplĭh ‘nao tơchăr lơ̆m tơdrong oei sa;; pơgơ̆r, tơmơ̆t jên jang, tơgŭm djru rim ‘măng pơgơ̆r pơlong, twodrong vă jang pơjing tơdrong jang găh tơdrong oei sa jŏh ayŏ, rim trong tơchăr, tơmam drăm jŏh ayŏ gĭt kăl kĕ lang să lơ̆m hơdrŭh tơdăm hơ iŏh.

Tơblơ̆ nơ̆r: Amazưt