VOV4.Bahnar - Pơgê năr 29/7, tơ̆ Hơnĭh bơ̆ jang Khul kơdră tĕh đak, Dơnŏ anĭh chĕp pơgơ̆r pơtôch jang kiơ̆ Khôi luơ̆t groi tĕh păng tơ iung pơjing tơdrong vă pơjing Khôi luơ̆t Groi tĕh (hơmet ming) hop akom mă blŭng. Kơ iĕng Thủ tướng tĕh đak Lê Văn Thành, Kơdră Dơnŏ anĭh chĕp pơgơ̆r pơm tơm hop akŏm. Kiơ̆ đơ̆ng Dơnŏ anĭh tơm vei lăng Mŭk drăm bri brăh păng Cham char, đơ̆ng rŏng hloh 8 sơnăm jang kiơ̆ Khôi luơ̆t Groi tĕh, bơ̆ jang vei lăng groi tĕh hlôi iŏk đei jơnei hơ iă. Mă lei, lơ̆m jang kiơ̆ khôi luơ̆t oei đei lơ tơdrong tim mă lăp, tim mă ‘lơ̆ng nhen: Pơprŏ jang tim mă ‘lơ̆ng hơ iă; Tơdrong iŏk tơvĭh teh, hrŭ ăn, tơgŭm djru, pơjing hơnĭh oei ‘nao đei tơring tim mă trŏ lăp hăm tơdrong đei iŏk yua hơ iă kơ kon pơlei: Tơgar dĭh băl, tơkêng păng pơm glăi khôi luơ̆t găh groi tĕh oei đei ƀôh hơnơ̆ng ... Kơ yuơ lơ lŏh, tơdrong pơjing tơdrong vă jang Khôi luơ̆t Groi tĕh (hơmet ming) ‘noh jing tơdrong kăl hloh. Pơma pơtôch hop akŏm, Kơ iĕng Thủ tướng Lê Văn Thành athei Dơnŏ anĭh Chĭh pơjing Khôi luơ̆t Groi tĕh (hơmet ming) kăl lăng kiơ̆ kơ jăp Tơdrong tơchơ̆t kơsô̆ 18 kơ Hop akom mă pơđăm, Khul kơdră chĕp pơgơ̆r Trung ương jăl 13 vă sơđơ̆ng ăn tơlĕch jang kiơ̆ ‘lơ̆ng, jơnei vei lăng păng iŏk yua tĕh, pơjing hơyak pran ba tĕh đak bơ̆n atok tơ iung jang sa iŏk yua kơ jăp.

Tơblơ̆ nơ̆r: Amazưt