Tơdrong tơchơ̆t hơgăt tôm dôm tơdrong pơm tơ ‘ngla kơdih đơ̆ng anih pơtho pơhrăm, ưh kơ pơ mơ̆ng lơ̆m tơdrong pơm tơ ‘ngla kơdih jên hu, ‘noh đei: pơm tơ ‘ngla kơdih găh tơdrong hŏk, joăt jang; pơm tơ ‘ngla kơdih găh tơchĕng hơlen khoa hŏk; pơm tơ ‘ngla kơdih găh trong jang pơgơ̆r, bơngai jang, pơm tơ ‘ngla kơdih găh jang hơdai apŭng plĕnh teh; pơm tơ ‘ngla kơdih găh jên hu, tơmơ̆t jên jang. Pơtôch ‘măng hop akŏm, Phŏ Thủ tướng Lê Tiến Châu athei Anih tơm vei lăng găh Pơtho pơhrăm jang hơdai hăm dôm anih tơm ƀơm truh chih pơkeh hla ar Tơchơ̆t vă tơtom apĭnh tơgop nơ̆r đơ̆ng bơngai jang lơ̆m Khŭl kơdră teh đak hơdrol kơ ‘năr 20/7.

Hơdai hăm ‘noh jang hơdai hăm Anih tơm vei lăng Kŏng an, Anih tơm Jang tơbôl dăr hơlen dôm tơdrong jang đơ̆ng tơdrong tơchơ̆t, mă loi ‘noh jĭ dôm tơdrong ƀơm truh pơm tơ ‘ngla kơdih găh tơdrong hŏk kiơ̆ trong pơm tơ ‘ngla kơdih tôch ai găh hŏk hăm dôm tơdrong jang khoa hŏk ki thuơ̆t, kơmăy kơmŏk, băt hơdăh trong jang pơm tơ ‘ngla kơdih đơ̆ng pơtho pơhrăm đăi hŏk teh đak pơjing păng kơdih pơjing.