Hăm hơnăn “Pơtrŭt kơtang jang hơdoi mŭk drăm, pơih să rơvơn tơmơ̆t jên jang dih băl", hop akŏm đei vang năm đơ̆ng 400 hơnih mơdro sa kơ 2 teh đak akŏm lơ̆m rim tơdrong jang: kmăi kmŏk pơm tơlĕch tơmam drăm sa păng đak nhă, ICT, kmăi kmŏk rơgoh ‘lơ̆ng, ŭnh hơyuh, viên thông, tơ iung pơjing ming man, jang pơm tơlech kmăi kmŏk, jang jên hu, kmăi kmŏk khul lĭnh, ƀao hiêm năm jang tơ̆ teh đak đe, pơvih pơvăn tơdrong tơdrong khôi luơ̆t ... Iung pơma tơ̆ Hop akŏm, Thủ tướng Cộng hoà Slovakia sơkơ̆t hơdăh tơdrong tơgoăt tơgoăl ƀar teh đak đei tơ iung pơjing kiơ̆ trong jang hơdoi đunh đai tai sơnăm păng trong tơlĕch jang kăl hloh kơ ‘măng năm tơmang ‘măng mă ou ‘noh iŏk đei rim tơdrong drơ̆ng mĭnh nơ̆r, mă hơdăh pơm hơtŏk loi dơ̆ng tơgoăt tơgoăl jing Jang hơdoi gĭt kăl. Thủ tướng Robert Fico pơma hơdăh, Việt Nam jĭ boăl joăt tơm dơnơm kơ Slovakia tơ̆ Đông Nam Á. Slovakia ‘meh vă atŏk kơtang tĕch mơdro păng tơlĕch jang rim tơdrong vă jang hơdăh tơ̆ Việt Nam, mă kăl ‘noh lơ̆m rim tơdrong jang kăl nhen: vei lăng sơđơ̆ng teh đak, jang pơm tơlech kmăi kmŏk, sơđơ̆ng mạng, kmăi kmŏk pơm tơlĕch gre ôtô păng jang pơgang. Tơ̆ hop akŏm, Thủ tướng Lê Minh Hưng tơbăt ƀlep lơ̆m ‘măng năm tơmang Việt Nam ‘măng mă ou, 2 Thủ tướng hlôi pơdrơ̆ng kiơ̆ Nơ̆r tơchơ̆t atŭm găh tơdrong pơm hơtŏk tơgoăt tơgoăl Việt Nam - Slovakia jing Tơdrong jang hơdoi gĭt kăl; đơ̆ng noh hơnhăk Việt Nam đei jing teh đak blŭng a tơ̆ Đông Nam Á đei tơgoăt tơgoăl Jang hơdoi gĭt kăl hăm Slovakia; tơbăt ăn trong tơlĕch jang kơtang găh kơrŭn đĭ ai đơ̆ng ƀar teh đak vă pơjing đei jơhngơ̆m pran kơtang păng pơih đei mĭnh trong jang kăl ‘nao vă ƀar teh đak yak mơ̆t lơ̆m chăl atŏk tơ iung ‘nao kơtang hloh dơ̆ng, jơ̆p jang lang să hloh dơ̆ng.