Năr 13/4, Ban Bí thư Trung ương Đảng pơgơ̆r Hop akom lơ̆m teh đak chă tơchĕng hơlen, hŏk pơhrăm păng tơlĕch jang kiơ̆ Tơdrong tơchơ̆t Hop akom ‘măng mă ƀar Ban Chấp hành Trung ương Đảng jăl XIV. Iung pơma tơ̆ Hop akŏm, Tổng Bí thư, Kơdră chĕp pơgơ̆r Teh đak Tô Lâm pơma hơdăh trong jang, trong tơlĕch ăn đơ̆ng rŏng Hop akŏm ‘măng mă ou ‘noh băt hơdăh, pơgơ̆r tơlĕch jang kiơ̆ kơtang, jơnei, pơjing đei tơplih hơdăh lơ̆m khul jang chinh trĭ. Tổng Bí thư, Kơdră chĕp pơgơ̆r Teh đak Tô Lâm athei, iung jang kơtang hơmet pơ ‘lơ̆ng trong jang kơdih kơdih kiơ̆ tơring, kiơ̆ hơnih jang, kiơ̆ tơdrong jang lơ̆m pơprŏ atŏk tơ iung, trong tơlĕch ăn ‘noh rim trong pơprŏ atŏk tơ iung kơ tơring, trong pơprŏ jang kơ hơnih jang đei lăng kiơ̆ atŭm, tơgoăt dih băl lơ̆m tơring. Lơ̆m trong pơprŏ jang mă kăl lăng kơ jăp hloh dơ̆ng pơprŏ pơjing ŭnh hơyuh, pơtôch long hloi tơdrong tơmơ̆t jên jang kiơ̆ kơ bruh, kiơ̆ tơdrong ‘meh vă dang ei, kiơ̆ trong apĭnh-ăn, kiơ̆ jăl jang, kiơ̆ ƀôh kơ măt. Rim tơdrong vă jang ‘meh vă tơlĕch jang kăl pơlăp lơ̆m pơprŏ hơdrol, đei lăng hơlen mă hơdăh, mă tơpăt.