Hloh 150 ‘nu bơngai tang măt ăn dôm anih jang dêh char Lâm Đồng, dôm bơngai jang khoa hŏk, bơngai tơchĕng hơlen, khŭl grŭp, anih mơdro sa lơ̆m teh đak vang akŏm. Hop akŏm hlôi ‘măn lơ jơ tơroi tơbăt, pơma tơblang păng tơgop nơ̆r jum dăr dôm tơdrong găh kơjă kăp gĭt hơnăn pơlei tơm Festival pơkao Đà Lạt, dôm tơdrong ‘lơ̆ng ƀơm truh tơdrong lăp đon đơ̆ng tơmoi hăm hơnih năm tơmang lăng Đà Lạt, tơdrong jang tơmang lăng hơgei vă hơtŏk tơdrong chă năm lăng đơ̆ng tơmoi tơ̆ pơlei tơm pơkao.

Pơma tơ̆ hop akŏm, ƀok Tôn Thiện San, Kơdră Anih vei lăng kon pơlei pơlei tơm Đà Lạt pơma hơdăh, ‘moi kiơ̆ tơdrong jang Festival pơkao Đà Lạt, tơdrong jang pơtăm pơkao hlôi đei pôk pơ ư păng sơkơ̆t hơdăh hơnăn pơkao Đà Lạt ‘noh jĭ tơdrong pran kăl đei tơmơ̆t jên jang, iŏk jang, tơgop pơtrŭt mŭk drăm păng hơtŏk ‘lơ̆ng kơjă tơmam đơ̆ng tơdrong jang pơkao.