Hop akŏm khoa hŏk đei hơnăn “Hơnăp jang khŭl chĭh kơtơ̆ng ang, hơnĭh pơm tơlĕch kơsơ̆p hla bơar lơ̆m bơ̆ jang vei lăng jơhngơ̆m đon jang kơ Đảng" pơgơ̆r pơgê năr 28/10 tơ̆ Hà Nội.

Rup hop akŏm

Hop akŏm kơ yuơ Nhà xuất bản Chính trị quốc gia Sự thật iung jang hơdoi hăm Hnam trương Báo chí và Tuyên truyền pơgơ̆r. Tơ̆ hop akŏm, rim bơngai tang măt tơbăt, trŭh dang ei lơ̆m tĕh đak bơ̆n đei 815 dơnŏ anĭh bơ̆ jang chĭh kơtơ̆ng ang, 57 dơnŏ anĭh pơm tơlĕch hla bơar hăm mơjĭt rơbau ‘nu bơngai chĭh kơtơ̆ng ang, bơngai jang akŏm. Rim dơnŏ anĭh chĭh kơtơ̆ng ang, hơnĭh pơm tơlĕch kơsơ̆p hla bơar roi năr roi pran kơtang, tơnăp hăm tơdrong atŏk tơ iung atŭm kơ apŭng plĕnh tĕh, pơjing đei lơ tơmam drăm gĭt kăl lơ̆m iŏk đei jơnei tĭh chăl sơnăm kơ tĕh đak. Mă lei, pơtêng hăm tơdrong ‘mĕh vă atŏk tơ iung ‘nao kơ tĕh đak, hơnăp jang kơ khŭl chĭh kơtơ̆ng ang, hơnĭh pơm tơlĕch lơ̆m vei lăng trong bơ̆ jang, iung tơ jră hăm dôm nơ̆r hơlĕnh pơdăr, pơma sa kơnê̆ oei tim mă bơ̆ jang ‘lơ̆ng tơpă; kăl đei tơplĭh, xơkơ̆t hơdăh trong jang ‘nao, kơtang hlŏh dơ̆ng. Đơ̆ng nŏh vă atŏk loi dơ̆ng hơnăp jang, jơhngơ̆m pran kơ dĭh lơ̆m pơchŏh trong ăn kon pơlei, vei lăng ‘lơ̆ng jơhngơ̆m đon kơ dĭh, vei lăng năng tông kơjăp trong bơ̆ jang đơ̆ng Đảng, iung tơ jră phă pơrăm dôm nơ̆r pơma glăi au to.