VOV4.Bahnar - ‘Năr 16/9, Anih vei lăng kon pơ lei dêh char Dak Nông pơ gơ̆r Hop akŏm khoa hŏk iŏk nơ̆r tơ gop Proh hơ met dêh char Dak Nông sơ năm 2021 -2030 trĕng lăng truh sơ năm 2050, hăm tơ drong vang akŏm đơ̆ng lơ bơ ngai joăt jang kơ anih jang, kŏng ti roi tơ ƀôh teh đak đe, tang măt dôm grŭp jang tih. Tơ̆ hop akŏm, dôm bơ ngai tang măt hlôi tơ blang hơ dăh, tơ gop nơ̆r vă Dak Nông ƀôh hơ dăh hloh dôm tơ drong oei đei păng tơ lĕch dôm trong jang vă dêh char hơ tŏk, iŏk jang đei yua dôm tơ mam ‘lơ̆ng, tơ drong pran, pơm hơ yak ‘lơ̆ng lơ̆m hơ tŏk tơ iung mŭk drăm - tơ pôl.

Hop akŏm pơ ma dơ nuh

Kiơ̆ Tiến sỹ Nguyễn Trọng Uyên, sơ̆ pơm Phŏ kơ dră Anih jang proh hơ met akŏm âu ‘noh jĭ Dak Nông athei hơ tŏk đei dôm tơ drong đei hơ drô̆, pha ra. Tơ drong hơ drô̆ đei kơ dêh char ‘noh jĭ mong đei lơ bô-xít tih hloh apŭng plĕnh teh, đei tŏ ‘mi kial rơ ngơp prăt sơ năm, đei Groi teh ‘lơ̆ng rŏ jơ̆p plei teh UNESCO; oei tơ̆ anih dơ̆ng đei yua ‘măng trong tơ goăt Tây Nguyên hăm Đông Nam Bộ,  jĭ dôm tơ drong hiôk vă dêh char hơ tŏk tơ iung pran kơ tang găh kơ măy kơ mŏk sir iŏk tơ mam drăm lơ̆m teh păng tơ mang lăng.

Thuem: Tơ blơ̆