VOV4.Bahnar - ‘Năr 16/8, tơ̆ plt Hồ Chí Minh, Kơ dră jang lơ̆m Anih tơm Chinh trĭ, Kơ dră tĕh đak Nguyễn Xuân Phúc, Kơ dră Anih pơ gơ̆r chih pơ jing “Tơ drong jang pơ tôch Tơ drong tơ chơ̆t Trung ương 8 jăl XI găh Trong vei lăng tĕh đak lơ̆m chăl ‘nao pơ gơ̆r Hop akŏm khoa hŏk “Nơ̆r tơ blang-Tơ pă tơ̆ yăn âu găh tơ drong vei lăng Tĕh đak lơ̆m chăl ‘nao”.

Kơ dră tĕh đak Nguyễn Xuân Phúc pơ gơ̆r Hop akŏm khoa hŏk “Nơ̆r tơ blang-Tơ pă tơ̆ yăn âu găh tơ drong vei lăng Tĕh đak lơ̆m chăl ‘nao”

Đơ̆ng rŏng lơ ƀai chih tơ blang, pơ ma lơ̆m hop akŏm, Kơ dră tĕh đak Nguyễn Xuân Phúc drơ̆ng nơ̆r, tơ chĕng ‘lơ̆ng dôm bơ ngai tang măt vang tơ gop lơ nơ̆r gĭt kăl, pơm hơ dăh lơ tơ drong kăl lơ̆m tơ drong jang vei lăng tĕh đak. Atŭm hăm ‘nŏh pơ ma hơ dăh tơ drong ‘lơ̆ng đơ̆ng Tơ drong tơ chơ̆t Trung ương 8 jăl XI, tơ drong trŏ ƀlep đơ̆ng lơ tơ drong tơ chơ̆t, nơ̆r pơ tho nai đơ̆ng Đảng, tơ gŭm ăn tơ drong jang vei lăng sơ đơ̆ng Tĕh đak lơ̆m chăl ‘nao khei ‘năr âu ki iŏk đei lơ tơ drong jơ nei gĭt kăl.

Kơ dră tĕh đak drơ̆ng nơ̆r hăm dôm bơ ngai tang măt akhan, athei hơ tŏk kơ sư̆k atŭm, lơ̆m nŏh pơ jing “kơ jăp đon lui đơ̆ng kon pơ lei” vă vei lăng tĕh đak XHCN đei năng jĭ trong jang tôch gĭt kăl, jĭ 1 lơ̆m dôm tơ drong jang athei bơ̆ jang hơ nơ̆ng, jĭ tơ drong tôch kăl, tôch kăp gĭt vă vei lăng Tĕh đak hrei ‘nâu.

Dơ̆ng: Tơ blơ̆