Iung pơma tơ̆ hop akŏm, Phŏ Kơdră Anih tơm jang Khoa hŏk păng Kơmăy kơmŏk Trần Trung Tính tơbăt, kiơ̆ đơ̆ng Tơdrong tơchơ̆t kơsô̆ 21/2026, Thủ tướng Tĕh đak hlôi tơlĕch ăn Hơnăn kơmăy kơmŏk gĭt kăl păng tơmam kơmăy kơmŏk gĭt kăl. Việt Nam băt hơdăh 10 kơmăy kơmŏk gĭt kăl, lơ̆m noh đei kơmăy kơmŏk kơsô̆, kơmăy kơmŏk lượng tử, kơmăy kơmŏk sinh hŏk păng y sinh hơgei, vă tơmơ̆t jên jang, sơng đei tơmơ̆t jên jang, pơtrŭt tơchĕng hơlen, iŏk yua păng pơm tơ'ngla rim kơmăy kơmŏk tơm.

Lơ̆m khei 'năr bơ̆ jang kiơ̆ Tơdrong tơchơ̆t 57 găh hơtŏk tơiung khoa hŏk, kơmăy kơmŏk, tơplih 'nao pơcheh hơgei păng tơplih kơsô̆, hop akŏm tơƀôh hơdăh ‘meh vă tơplih 'nao đon tơchĕng, hơnhăk khoa hŏk păng kơmăy kơmŏk jing tơdrong ‘lơ̆ng kơtă pơyua ăn hơtŏk tơiung. Dôm bơngai jang khoa hŏk akŏm pơma dơnuh găh kơmăy gơ̆h hơgei, kơmăy kơmŏk lượng tử, hoă hŏk kơjăp 'lơ̆ng, ŭnh hơyuh hạt nhân, tơplih ŭnh hơyuh păng dôm tơdrong khoa hŏk, kơmăy kơmŏk tŏk bŏk tơlĕch ăn.