VOV4.Bahnar - Pơ gê 31/3, tơ̆ Hà Nội pơ gơ̆r hôp hơ dai lơ̆m Hop akŏm bơ ngai tĕch mơ dro oei mơ lôh Việt Nam ‘măng mă 7, jăl jang 2022-2025 hăm hơ năn “Năm hơ drol tơ plih ‘nao – Pơ jing kơ jă kăp gĭt”. Khul bơ ngai tĕch mơ dro oei mơ lôh Việt Nam đei pơ jing tơ̆ 63 dêh char, plt, hăm 11 rơ bâu ‘nu bơ ngai jang. Dôm anih tĕch mơ dro lơ̆m khul oei chă tơ drong jang ăn 3 triu ‘nu bơ ngai, akŏm đĭ đăng đei iŏk yoa rim sơ năm hlŏh 30 ti đô la Mi. Hop akŏm pơ ma nuh, pôk rơih 153 ‘nu bơ ngai jang lơ̆m Trung ương Khŭl bơ ngai tĕch mơ dro oei mơ lôh Việt Nam jăl 7.

Grŭp kơ dră chĕp kơ̆l Khul bơ ngai tĕch bơ ngai oei mơ lôh Việt Nam pơ gơ̆r hop akŏm

Truh hop akŏm păng iung pơ ma nơ̆r pơ tho tơ̆ âu, Phó Thủ tướng Lê Minh Khái pôk pơ ư dôm tơ drong jơ nei, tơ gop gĭt kăl đơ̆ng khul bơ ngai tĕch mơ dro oei mơ lôh păng Khul bơ ngai tĕch mơ dro kơ Việt Nam jăl jang âu ki. Lơ̆m jăl jang ‘nao, Khul bơ ngai tĕch mơ dro oei mơ lôh Việt Nam athei tơ pă pơ jing đei 1 bơ bŭng hnam atŭm, akŏm đĭ đăng, tơ guăt ƀơ̆r đon, vei lăng tơ drong đei yoa tơ găl ăn bơ ngai tĕch mơ dro oei mơ lôh. Tơ lĕch đei lơ trong jang xa, hơ tŏk tơ drong jang hơ doi, tưk tơ iung anih tĕch mơ dro, roi tơ băt ăn băl, hơ tŏk đon hlôh vao ăn rim bơ ngai jang.

Dơ̆ng: Tơ blơ̆