VOV4.Bahnar - Kơ sơ̆ ‘năr 6/3 tơ̆ Đà Nẵng, pơ gơ̆r Hop akŏm Khŭl chĕp kơ̆l Jơ nŭm pơ gơ̆r kon pơ lei rim dêh char, pơ lei tơm tơ ring pơ băh tŏk bŏk păng Tây nguyên ‘măng mă mônh, jăl jang 2021-2026. Dôm bơ ngai tang măt hlôi mơ̆ng hla ar tơ roi tơ băt đơ̆ng khŭl chĕp kơ̆l Jơ nŭm pơ gơ̆r kon pơ lei rim dêh char, pơ lei tơm pơm hơ dăh găh 3 tơ drong. Mă mônh ‘noh “ Hlôh vao lơ̆m tơ drong hơ tŏk ‘lơ̆ng, đei yua ‘măng hop akŏm Khŭl chĕp kơl Jơ nŭm pơ gơ̆r kon pơ lei dêh char găh rim tơ drong tơ roi tơ blang đơ̆ng rim anih jang, khŭl jang, kơ dih kiơ̆ Luơ̆t pơ gơ̆r khŭl kơ dră tơ ring”. Tơ drong mă 2 ‘noh jĭ “ Tơ drong tơ plih ‘nao trong jang, hơ tŏk ‘lơ̆ng bơ̆ jang dăr hơ len, dăr lăng tơ roi tơ băt, tơ drong jang , hla ar chih ming tơ drong tơ chơ̆t pơ trŭh tơ̆ ‘măng hop akŏm”. Tơ drong mă 3 ‘noh jĭ “ Hlôh vao, trong jang hơ tŏk ‘lơ̆ng, đei yua bơ̆ jang dăr hơ len, dăr lăng đơ̆ng rim khŭl kơ dră chĕp kơ̆l Jơ nŭm pơ gơ̆r kon pơ lei”. Pơ ma pơ tôch Hop akŏm, Phŏ Kơ dră chep kơ̆l Kuôk hô̆k Trần Thanh Mẫn athei Khŭl chĕp kơ̆l Jơ nŭm pơ gơ̆r kon pơ lei rim tơ ring kăl kơ hơ nơ̆ng hơ tŏk jơ hngơ̆m đon kơ chăng, hơ gei păng tơ tĕnh lơ̆m tơ drong jang kiơ̆ hơ năp jang, tơ drong jang; răp hơ len lăng dôm tơ drong tơ plih ‘nao đơ̆ng Kuôk hô̆i vă gơh tơ mơ̆t yua, yak hơ dai mă lăp hăm rim tơ ring.

Thuem: Tơ blơ̆