Hop akŏm drơ̆ng nơ̆r hăm tơdrong Tơchơ̆t, chih hơdăh 13 tơdrong hơgăt, 05 tơdrong jang tŏk; 07 Tơdrong jang tơm, gĭt kăl vă bơ̆jang lơ̆m jăl jang đơ̆ng 2026-2031. Mĭnh tơdrong tơplih ‘nao vă tơƀôh trong jang lơ̆m jăl ‘nâu ‘noh Hop akŏm tơlĕch tơdrong jang “Druh dăm sơnăm mơlôh Việt Nam năm hơdrol lơ̆m chăl ‘nao”, pơjing jơhngâm tưk tơiung đon tơnăp, năm hơdrol, bơ̆ jang gơ̆h hơgei păng hơpơi ‘mĕh plang pơyơ̆r đơ̆ng đe druh dăm. Hop akŏm oei chih hơdăh tơdrong jang “Atŏk tơiung tôm tơdrong ăn druh dăm Việt Nam” mưh hŏk pơhrăm, pơm hơtŏk đon rơgei; jang tŏk, pơtâp pơhrăm hơkâu jăn; pơm hơtŏk tơdrong arih xa găh jơhngâm đon.

Hăm đon tơchĕng “Đon nuih đơ̆ng kơdih đei – Jang hơdrol gơ̆h hơgei – Hơpơi ‘mĕh plang pơyơ̆r – Pơm tơngla ning mônh kơnh”, Hop akŏm krao hơvơn đĭ đăng rim anih jang đoan, khul grŭp đoàn viên, druh dăm Việt Nam lơ̆m teh đak păng tơ̆ teh đak đe băt hơdăh hơnăp jang kơdih; tưk tơiung jơhngâm đon 'mêm kơ teh đak, hơpơi 'mĕh jang tŏk, đon hưch 'mêm kơ hơdrĕch hơdrung, kơjă kăp gĭt đơ̆ng tơdrong juăt kơ kon bơngai Việt Nam, đon jang tơnăp đơ̆ng druh dăm sơnăm mơlôh vă jăh tơlĕch jang hloi dôm tơdrong hlôi đei Hop akŏm drơ̆ng nơ̆r, pơjing đon kơchăng ăn mĭnh jăl jang ‘nao hăm lơ tơdrong jơnei 'nao.