Pơgê năr 26/10, tơ̆ Hà Nội, Dơnŏ anĭh tơm Kŏng ang Việt Nam hăm Dơno anĭh tơm Kŏng ang tĕh đak Cộng hòa dân chủ nhân dân Lào pơgơ̆r Hop akŏm Kơdră dơnơm pơtôch mĭnh sơnăm jang kiơ̆ Hla bơar ƀlŏk hơdơ̆r ƀar păh Dơnŏ anĭh tơm Kŏng ang 2 tĕh đak găh jang hơdoi tang găn ma tuý.

Hop akom Kơdră dơnơm Việt Nam-Lào găh jang hơdoi tang găn ma tuý

Kiơ̆ tơbăt tơ̆ Hop akŏm, khei năr au ki, Kŏng ang ƀar tĕh đak hlôi jang hơdoi hơlen hơdăh dôm tơdrong yoch păng yoch ma tuý kơ 2 tĕh đak, mă kăl tơ̆ trong sơlam tĕh đak vă tơchă băt hơdăh rim jal trong, tơring kăl đe tĕch mơdro ma tuý đơ̆ng nŏh sơkơ̆t hơdăh đei 4 jăl trong đe chơ pơdŭ ma tuý đơ̆ng tơring “Kơlang” lơ̆m lơ̆m tĕh đak Lào păng yak hlŏh rim tơring kơ Lào păng Việt Nam.

Rim Kơdră tang măt vang hop akŏm

Kŏng ang 2 tĕh đak jei jang hơdoi pơjing hla kak mĭnh ƀar jăl trong păng tơring kăl rim bơngai tĕch mơdro ma tuý vă yak chơ pơdŭ đơ̆ng tơring “Kơlang” lơ̆m lơ̆m tĕh đak Lào đơ̆ng nŏh năm tơ̆ Việt Nam. Khei năr jang hơdoi, khŭl kŏng ang Việt Nam hlôi ƀô̆h, rôp hlŏh 5.300 ‘măng hăm hloh 7.300 ‘nu bơngai tĕch mơdro ma tuý...

Dơnŏ anĭh tơm Kŏng ang 2 tĕh đak athei rim hơnĭh bơ̆ jang, kŏng ang rim tơring sơlam 2 tĕh đak hơnơ̆ng atŏk kơtang jang hơdoi tang găn hơlau, tơjră phă pơrăm ma tuý kiơ̆ trong pơkăp lơ̆m Hla bơar ƀlŏk hơdơ̆r ƀar păh Dơnŏ anĭh tơm Kŏng ang 2 tĕh đak găh jang hơdoi tang găn ma tuý; iung jang hơdoi năm pơtrui, dăr joang, phă pơrăm rim hơnĭh akŏm iŏk yua ma tuý, sơđơ̆ng tơpôl tơ̆ tơring sơlam 2 tĕh đak.