Hop akŏm đei tơdrong vang akŏm đơ̆ng dôm bơngai tang măt, Kơdră tơm ASEAN vei lăng tơdrong kơtơ̆ng ang, dôm teh đak jang hơdai pơma dơnuh Trung Quốc, Nhật Bản, Hàn Quốc păng dôm teh đak tang măt. Pơma tơ̆ hop akŏm, Phŏ kơdră teh đak Võ Thị Ánh Xuân akhan, apŭng plĕnh teh tŏk bŏk lơ̆m khei ‘năr ƀĕnh tơdrong tơplih, kơtơ̆ng ang đei akŏm iŏk yua đơ̆ng kơmăy kơmŏk păng Internet pơm ăn tơdrong păr ang hrĕnh, tơdrong ƀơm truh đei ƀôh lơ̆m plei teh.

Yua thoi noh, tơdrong jang hơdai pơtrŭt gơh băt kơtơ̆ng ang tơtom, ƀlep kiơ̆ tơdrong kơ sô̆; tơplih kơtơ̆ng ang jing tơdrong hlôh vao vă tơgŭm anih mơdro sa, hơtŏk ‘lơ̆ng jang sa păng tơdrong arih sa ăn kon pơlei, tơ jur ƀiơ̆ ƀơm ưh kơ ‘lơ̆ng đơ̆ng tơdrong kơtơ̆ng ang ưh kơ ‘lơ̆ng ‘noh jĭ ‘meh vă kăl hloh hrei ‘nâu, tơ̆ pơ đĭ teh đak, tơring păng apŭng plĕnh teh, lơ̆m noh đei ASEAN. Tơ̆ hop akŏm âu, Việt Nam tơlĕch 1,2 trong jang vă pơtrŭt tơplih kơ sô̆, hơtŏk ‘lơ̆ng tơdrong iŏk yua internet păng tơdrong băt kơmăy kơ sô̆ ăn kon pơlei; hơtŏk loi dơ̆ng roi tơƀôh um rup kơ ASEAN păng dôm teh đak jang lơ̆m khŭl....