VOV4.Bahnar -  Kơsơ̆ năr 3/10, tơ̆ Hà Nội, Anih tơm Kŏng thương jang atŭm hăm Jơnŭm jang mŭk drăm Châu Âu tơ̆ Việt Nam pơgơ̆r Hop akŏm hla bar tơroi găh Hop akŏm kơpal păng Pơdăh mŭk drăm jơk 2022. Pơgơ̆r đơ̆ng năr 28 - 30/11 tơ̆ pơlei tơm Hồ Chí Minh, Hop akŏm kơpal păng Pơdăh mŭk drăm Jơk 2022 noh kăp gĭt lơ̆m tơdrong pơm kiơ̆ dôm tơlĕch hơtŏk tơ iung kơjăp trŏ ƀlep hăm tơchơ̆t ƀar păh Việt Nam păng Jơnŭm Châu Âu, tơgop pơm kiơ̆ Pơkăp jang kơ teh đak găh hơtŏk tơ iung Jơk kơ Việt Nam.  Pơdăh Mŭk drăm Jơk gô tơbang, pơdăh dôm kơmăi kơmŏk 'nao rơgei, tơmam drăm 'lơ̆ng, păng trong jang mŭk drăm jơk, mŭk drăm xơđơ̆ng kơ dôm anih jang mŭk drăm Châu Âu păng Việt Nam. Atŭm hăm noh, dôm tơdrong Hop akŏm păng Pơma đam lơ̆m pơkăp Pơdăh gô jing tơdrong tơm vă hơtŏk jang hadoi đơ̆ng jơnŭm jang mŭk drăm Châu Âu păng Việt Nam, tơgop hơtŏk minh tơdrong jang mŭk drăm Việt Nam jơk, kơjăp xơđơ̆ng kiơ̆ tơdrong tơroi hlôh vao pơm jang păng tơplih kơmăi kơmŏk trong jang 'nao.

VOV/Lan tơblơ̆ nơ̆r