Kơdră chĕp pơgơ̆r Kuô̆k hô̆i pơma hơdăh, tơdrong tơ iung pơjing Tơdrong jang tơm teh đak găh pơtho pơhrăm ‘noh tơdrong jang kăl hloh, kăl tơmơ̆t lơ găh khul jang păng jơ ‘năr. Tơdrong vă jang tơm hloh ‘noh kăl pơm hơtŏk bơ̆ jang ‘lơ̆ng pơtho pơhrăm, mă kăl khul ƀok thây kô pơtho păng kang ƀô̆ chĕp pơgơ̆r. Kăl tơplih ‘nao jơhngơ̆m đon jang đơ̆ng joăt joe so tơplih jing iung jang tơnăp hŏk pơhrăm kơtang, atŏk kơtang kĕ xek tơlang dôm tơdrong; tơdrong kăl hloh ‘noh oei vei kơjăp đêl so kơ trong bơ̆ jang pơtho pơhrăm ‘noh “blŭng hŏk jơhngơ̆m đon ‘lơ̆ng, đơ̆ng rŏng hŏk tơdrong gơh hơgei hle”. Găh Tơdrong jang tơm teh đak găh vei lăng năng tông jơhngơ̆m pran jăng grăng akou, măt bơngai păng atŏk tơ iung jang kăl 2026 – 2035, ‘nou jing trong tơm pơm hơtŏk bơ̆ jang ‘lơ̆ng gơh hơgei kơ hnam pơgang tơring, phương; atŏk kơtang jang pơgang tang găn hơlou jĭ jăn, pơm hơtŏk jơhngơm pran jăng grăng akou kon pơlei ‘moi kiơ̆ trong jang “Tang găn hơlou tơdrong jĭ jăn gloh gloi kơ ming hơmet jĭ jăn”. Kơdră chĕp pơgơ̆r Kuô̆k hô̆i jei athei jang kiơ̆ kmăi kmŏk, tơplih kơsô̆ păng atŏk kơtang jang ‘lơ̆ng khul bơ̆ jang pơgang. Kơ yuơ kon bơngai ‘noh kăl hloh, tơƀôh hơdăh găh tơdrong jang ‘lơ̆ng lơ̆m bơ̆ jang pơgang, pơđĭ găh pơtho pơjing, pơtruh ăn kmăi kmŏk kih thuơ̆t, trong tơgŭm djru, pơm hơtŏk jơhngơ̆m đon ‘lơ̆ng, kon jên bơ̆ jang.