Tơdrong tơchơ̆t kơsô̆ 79 - NQ/TW ‘năr 06/01/2026 đơ̆ng Anih tơm Chĭnh trĭ tơƀôh hơyăk tơplih ‘lơ̆ng lơ̆m đon tơchĕng hơtŏk tơiung mŭk drăm teh đak: Đơ̆ng hơnăp jang “vei kơjăp, tôm” jing hơnăp jang pơm pơcheh, chông ba păng pơih trong ăn jang tŏk ‘lơ̆ng, lơ̆m tơdrong pơvei tơgŭm băl păng akŏm sa yua hăm tơring mŭk drăm kơdih. Lơ̆m kơplăh ‘noh, Tơdrong tơchơ̆t kơsô̆ 80 - NQ/TW, ‘năr 07/01/2026 đơ̆ng Anih tơm Chĭnh trĭ găh hơtŏk tơiung joh ayŏ jing 1 trong jang ‘lơ̆ng tôch gĭt kăl lơ̆m khei ‘năr hrei ‘nâu; tơlĕch ăn hơtŏk tơiung joh ayŏ lơ̆m khei ‘năr mơ̆t jang hơdai hăm apŭng plĕnh teh, ‘noh jĭ tơdrong kơchăng mơ̆t jang hơdai. Tơdrong 'nao tơ̆ Tơdrong tơchơ̆t 80 jĭ trong gơh băt tôm tong păng ‘nao hăm hơtŏk tơiung joh ayŏ.

‘Măng mă blŭng joh ayŏ đei tơlĕch ăn lơ̆m tơdrong pơvei kơjăp hăm mŭk drăm, anih tĕch mơdro păng rim tơdrong jang kơmăy kơmŏk joh ayŏ, lăng tơmam joh ayŏ jing mĭnh tơmam hơtŏk tơiung păng jing tơdrong tơm gĭt kăl kơ “jơhngơ̆m pran ‘lơ̆ng” kơ teh đak. Pơma pơgơ̆r tơ̆ hop akŏm, Tổng Bí thư Tô Lâm tơbăt, 2 tơdrong Tơchơ̆t ‘nao đei pơjing kiơ̆ lơ̆m pơtôch gĭt kăl yan âu păng hơtŏk tơiung đon tơchĕng lĭ huơ̆n lơ̆m khei ‘năr teh đak yak mơ̆t lơ̆m jăl jang hơtŏk tơiung ‘nao, hơdai hăm hơmet pơ ‘lơ̆ng 2 ‘meh vă đei tơdrong ‘lơ̆ng ‘noh jĭ hơtŏk loi dơ̆ng lơ̆m tơmam drăm păng hơmet ming jơhngơ̆m đon lơ̆m teh đak. Pơma hơdăh khŏm pơjing mŭk drăm hiôk hian, pơm tơm kơdih, hơƀĕch hơbal, đei yua tơklep hăm mơ̆t jang hơdai hăm apŭng plĕnh teh jrŭ să păng pơjing tơdrong joh ayŏ Việt Nam hơgei, ƀĕnh tơdrong ‘lơ̆ng hơiă kơ hơdrĕch hơdrŭng.