VOV4.Bahnar - Pơgê năr 25/4, tơ̆ Hơnĭh bơ̆ jang Khŭl kơdră chĕp pơgơ̆r Tĕh đak, Dơnŏ anĭh chĕp pơgơ̆r Tĕh đak găh bơ̆ jang tang găn tŏ ‘mi kial pơrăm jang hơdoi hăm Dơnŏ anĭh bơ̆ jang tĕh đak tang găn hơlau tơdrong răm đơ̆ng tŏ ‘mi kial pơrăm păng Tơchă dŏng pơgơ̆r hop akŏm lơ̆m tĕh đak gahw bơ̆ jang tang găn tŏ ‘mi kial pơrăm păng Tơchă dŏng sơnăm 2022.

Kơ iĕng Thủ tướng Lê Văn Thành, Kơdră Dơnŏ anĭh chĕp pơgơ̆r tĕh đak pơm tơm hop akŏm. Iung pơma tơ̆ Hop akŏm, Kơdră chĕp pơgơ̆r Dơnŏ anĭh tơm vei lăng Chŏh jang sa păng Atŏk tơ iung tơring tơrang Lê Minh Hoan, Kơ iĕng Kơdră Dơnŏ anĭh tơbăt, sơnăm 2021, mă đơ̆ng rim tĕh đak lơ̆m plei tĕh hlôi hơdrin tang găn hơlau mă lei tŏ ‘mi kial pơrăm hlôi pơm ăn 16.000 ‘nu bơngai lôch, hiong dong, akŏp hiong răm găh mŭk drăm hlŏh 340 ti dolar păng pơm kơnê̆ trŭh erĭh sa, mŭk drăm-tơpôl kơ lơ tĕh đak. Kiơ̆ hơlen đơ̆ng Hơnĭh tơm Tơdra hơlau tŏ ‘mi kial tĕh đak, sơnăm 2022 rŏ năng đei ƀô̆h kial hơbut kơtang hăm dang 10-12 ‘măng kial hơbut pơrăm tơ̆ đak dơsĭ Hơlĕch. Hlŏh đơ̆ng tŏ ‘mi kial blŭng sơnăm trŭh dang ei, ro năng, ‘mi kial sơnăm 2022 gô hơnơ̆ng pơm pơrăm kơtang păng chrĭh chrĕng.

Tơblơ̆ nơ̆r: Amazưt