VOV4.Bahnar - Pơ gê 11/1, Ban Bí thư pơ gơ̆r hop akŏm lơ̆m tĕh đak, pơ tôch tơ drong jang dăr lăng sơ năm 2021, tơ lĕch tơ drong jang sơ năm 2022.

Jơ bơ̆ jang lơ̆m hop akŏm

Pơ ma lơ̆m hop akŏm, Kơ dră chĕp kơ̆l Ban Bí thư  Võ Văn Thưởng pơ ma hơ dăh, vă hơ tŏk đon nuih, bưng ai, đon rơ gei mưh chĕp kơ̆l pơ gơ̆r tĕh đak, Đảng bơ̆n athei hơ nơ̆ng hơ tŏk păng hơ nhăk tơ drong pơ jing, hơ met ming Đảng tŏk kơ jung hlŏh dơ̆ng, tơ klep hăm tơ drong pơ jing anih jang chinh trĭ; tang găn xa pơ jĭp tơ klep hăm tang găn tơ drong glăi; tang găn hơ dai hăm sek tơ lang mă tơ păt dôm tơ drong glăi, đei jơ hngâm đon ưh kơ ‘lơ̆ng, chă tơ chĕng tơ plih kơ dih.

Ƀok Võ Văn Thưởng athei, dôm anih jang đảng, khul jang đảng, anih dăr hơ len jơ̆p tơ ring akŏm jơ hngâm tơ chĕng hơ len, hŏk pơ hrăm, tơ lĕch jang đei yoa dôm tơ drong tơ chơ̆t, nơ̆r pơ tho, tơ drong hơ găt đơ̆ng Đảng găh tơ drong dăr lăng, ki luơ̆t đảng. Pơ jing tơ drong jang, trong dăr lăng mă ‘lơ̆ng, lăp hăm rim tơ drong tơ̆ tơ ring, tơ̆ anih jang.

Dơ̆ng: Tơ blơ̆