Kiơ̆ tơdrong jang, tơ̆ pơgê, Anih chĕp kơ̆l pơgơ̆r Quốc hội ăn tơgop nơ̆r găh Luơ̆t hơmet ming, tơmơ̆t dơ̆ng 1,2 hơpăng đơ̆ng Luơ̆t Pơlong pơjei, pôk hơpăh; ăn tơgop nơ̆r găh Luơ̆t hơmet ming, tơmơ̆t mơ̆ng 1,2 hơpăng đơ̆ng Luơ̆t Anih jang tang măt teh đak Cộng hòa xã hội chủ nghĩa Việt Nam tơ̆ teh đak đe. Anih chĕp kơ̆l pơgơ̆r Quốc hội gô set hơlen, kĭ ăn athei đơ̆ng Thủ tướng Teh đak găh tơdrong pôk hơtŏk Bơngai tang măt tôm tơdrong teh đak Cộng hòa xã hội chủ nghĩa Việt Nam tơ̆ teh đak đe. Hơdai ‘noh, set hơlen, pơdrơ̆ng kiơ̆ Tơdrong tơchơ̆t đơ̆ng Anih chĕp kơ̆l pơgơ̆r Quốc hội tơlĕch ăn Tơdrong tơchơ̆t bơ̆jang tơbôl kơ Quốc hội.

Tơ̆ kơsơ̆, Anih chĕp kơ̆m pơgơ̆r Quốc hội set hơlen, pơdrơ̆ng kiơ̆ Tơdrong tơchơ̆t hơmet ming, tơmơ̆t dơ̆ng Tơdrong tơchơ̆t kơsô̆ 1744 ‘năr 27/6/2025 đơ̆ng Anih chĕp kơ̆l pơgơ̆r Quốc hội găh Hơnăn Bơngai jang lơ̆m Jơnŭm rơih iŏk, dăr hơlen Bơngai sek tơlang kơ teh đak; ăn tơgop nơ̆r hăm Hla ar pơtruh đơ̆ng Kơdră vei lăng Anih sek tơlang kon pơlei gĭt kăl pơtruh ăn Quốc hội kĭ ăn athei pôk hơtŏk Bơngai sek tơlang kơ Anih sek tơlang kon pơlei gĭt kăl.