VOV4.Bahnar - Năr ‘nâu (30/5), Hop akŏm mă 3, Kuô̆k hô̆i jăl 15 mât lơ̆m giĕng bơ̆ jang mă 2. Kiơ̆ tơ drong jang, pơ gê hei Kuô̆k hô̆i mơ̆ng hla ar chih tơ roi đơ̆ng Khul Dăr hơ len păng pơ ma nuh tơ̆ hnam hôp găh tơ drong jang kiơ̆ trong tơ gŭm, khôi luơ̆t mưh tơ prŏh trong jang iŏk đơ̆ng Luơ̆t Tơ proh trong jang đei tơ mât yoa. ‘Nâu jĭ tơ drong gĭt kăl yoa tơ dăh Tơ proh trong jang hơ drol đei bơ̆ jang trŏ ƀlep, ‘lơ̆ng hơ iă ‘nŏh gô pơ jing đei tơ drong ‘lơ̆ng vă jang atŏk tơ iung mŭk drăm tơ pôl ăn tĕh đak.

‘Ngoăih kơ jơ pơ ma nuh năr ‘nâu, lơ̆m giĕng Kuô̆k hô̆i oei ‘măn 2 năr bơ̆ jang đei pơih pơ re tơ păt lơ̆m Radio păng tivi. ‘Nŏh jĭ ‘năr 1 păng ‘năr 2/6, pơ ma nuh vă hơ len năng dơ̆ng trong jang atŏk tơ iung mŭk drăm, tơ pôl păng thu mong, tơ lĕch jên jang kơ tĕh đak sơ năm 2021; tơ drong jang kiơ̆ trong atŏk tơ iung mŭk drăm, tơ pôl păng thu mong, tơ lĕch jên jang kơ tĕh đak dôm khei blŭng sơ năm 2022; pơ tôch tơ drong jang kiơ̆ tơ drong Tơ chơ̆t kơ sô̆ 42 sơ năm 2017 găh jang pơ long năng tơ drong sek tơ lang jên hre kơ nê̆ đơ̆ng dôm anih asong tŏk iŏk jên păng tơ drong pơ dui đunh khei ‘năr jang kiơ̆ tơ drong Tơ chơ̆t ‘nâu.

Dơ̆ng: Tơ blơ̆