VOV4.Bahnar - ‘Năr 22/4, tơ̆ Anih jang kơ Khul kơ dră tĕh đak, Phó Thủ tướng Phạm Bình Minh sơng Phŏ Kơ dră tơm jang tơ bôl kơ Hnam khop Vatican, Ƀok Miroslaw Wachowski ƀlep ƀât năm tơ̆ Việt Nam vang pơ gơ̆r hop akŏm mă 9 Grŭp jang hơ doi Việt Nam – Hnam khop Vatican.  Phó Thủ tướng Phạm Bình Minh tơ ƀôh đon hơ iă tơ̆ hơ năp dôm tơ drong jang tŏk ‘lơ̆ng đơ̆ng tơ drong pơ vei Việt Nam păng Vatican.

Phŏ Kơ dră Miroslaw Wachowski bơ nê tơ drong pơ gơ̆r sơng đơ̆ng Khul kơ dră tĕh đak Việt Nam păng pơ ma hơ dăh ƀok Papa Francis hăm Hnam khop ling lang hơ pơi ‘mĕh tơ drong pơ vei đơ̆ng Việt Nam păng Hnam khop roi đunh roi tŏk ‘lơ̆ng, pơ jing tơ drong ‘lơ̆ng ăn tơ pôl bơ ngai lui kŏng yăo Việt Nam vang tơ gop ăn tơ drong jang tŏk kơ tĕh đak. Phŏ kơ dră oei drơ̆ng nơ̆r hăm dôm trong jang pơm hơ tŏk tơ drong pơ vei đơ̆ng 2 păh tơ̆ hơ năp kơnh, mă loi hơ tŏk tơ drong tơ ƀâp đơ̆ng 2 păh păng vei kơ jăp dôm tơ drong pơ ma nuh hlôi đei hrei ‘nâu.

Dơ̆ng: Tơ blơ̆