Thủ tướng Phạm Minh Chính tơchĕng ‘lơ̆ng Anih tơm jang Nội vụ păng dôm anih tơm, anih jang kơpal găh Khul kơdră teh đak hlôi kơchăng, adrin tơlĕch jang dôm tơdrong đei pơjao. Thủ tướng pơma hơdăh, kăt tơjur khul bơngai jang mă lei tơdrong jang oei đei yoa ‘lơ̆ng, tơjur ƀiơ̆ anih jang hơlam mă lei ưh đei tơjur hơnăp jang, tơdrong jang păng athei hơtŏk tơdrong jang tơ̆ tơring, hơtŏk tơdrong tơplih hăm kơmăy sô̆ mưh vei lăng teh đak vă pơm tơjur ƀiơ̆ tơdrong tơƀâp tơpăt, tơjur ƀiơ̆ tơdrong apinh song, ưh đei pơm pơmat tat ăn kon pơlei, găn ƀiơ̆ tơdrong găn xa pơgâm jên đe. 

Thủ tướng Phạm Minh Chính athei, lơ̆m khei ‘năr hơmet ming, kăt tơjur bơngai jang athei pơm ‘lơ̆ng ăn tơdrong đei yoa kơ teh đak păng kăn ƀô̆, bơngai jang vă gơ̆h đei trong jang, tơdrong tơgŭm lăp ‘lơ̆ng, kiơ̆ đơ̆ng vei lăng ‘lơ̆ng dôm tơdrong đei yoa trŏ luơ̆t. Atŭm hăm ‘nŏh athei jang ‘lơ̆ng dôm tơdrong jang chinh trĭ đei pơjao.