Hop akŏm jing hơnih pơma dơnuh hơnơ̆ng rim sơnăm đơ̆ng khŭl kơdră chĕp kơ̆l păng tơpôl anih mơdro sa vă chih iŏk dôm tơdrong tơhlăk đơ̆ng yan âu păng hơmet pơ ‘lơ̆ng tơdrong jang tơgŭm. Sơnăm ‘nâu, hop akŏm tơplih tơm đơ̆ng hơmet pơ ‘lơ̆ng mơmat tat jing vang pơcheh pơm tơdrong jang tơgŭm, jang kiơ̆ dôm tơdrong tơchơ̆t đơ̆ng Anih tơm Chĭnh trĭ găh hơtŏk tơiung khoa hŏk, kơmăy kơmŏk, tơplih ‘nao hơgei, tơplih kơsô̆ păng hơtŏk tơiung mŭk drăm kơdih.

Ƀok Đặng Hồng Anh, Kơdră vei lăng Khŭl mơdro sa sơnăm mơlôh Việt Nam tơbăt, hăm 34 hop akŏm tơring kŭm hăm hop akŏm kơdră kơpal pơma dơnuh hăm Khŭl kơdră teh đak, tơdrong tơm ‘noh jĭ akŏm tôm dôm nơ̆r apĭnh đơ̆ng tơring vă hơmet pơ ‘lơ̆ng kiơ̆ rim kơdră gơh kĭ ăn, pơm tơdrong hiôk hloh ăn anih mơdro sa hơtŏk tơiung.

“Mĭnh dêh char pơlei tơm ‘noh nhôn tă kơ hơdai hăm dôm bơngai joăt jang, bơngai jang khoa hŏk kŭm hăm dêh char gô tơblang hơdăh, chih akŏm vă vang tơroi tơdrong kơtơ̆ng ang; răp mơ̆ng nơ̆r tơgop đơ̆ng tơpôl mơdro sa, anih mơdro sa păng chih akŏm nơ̆r apĭnh gơih truh dêh char. Oei dôm tơdrong gơh kĭ ăn đơ̆ng anih tơm, anih jang kơpal, anih jang Trung ương păng Khŭl kơdră teh đak ‘noh nhôn gô chih akŏm tơmơ̆t lơ̆m nơ̆r apĭnh vă tơgŭm ăn tơpôl mơdro sa, anih mơdro sa hơtŏk tơiung ‘lơ̆ng hloh lơ̆m jăl jang ‘nao”.

Tơ̆ hop akŏm, rim bơngai tang măt akŏm tơroi băl dôm tơdrong tŏk bŏk tơlĕch ăn hăm Đắk Lắk nhen hơmet pơ ‘lơ̆ng hơnih tơmơ̆t jên jang vă hơvơn jên jang kiơ̆ trong tơlĕch jang dêh char; hơtŏk tơiung hơnih jang vei lăng dôm kơjă kăp gĭt choh jang sa lơ̆m kơmăy chih răk; pơtrŭt tơplih kơsô̆, tơplih ‘nao hơgei păng hơtŏk tơiung hơnih pơjing tơdrong jang sa.

Tơdrong pơma dơnuh rơhâu ‘măn lơ jơ vă anih mơdro sa pơma dơnuh kơtă hăm kơdră chĕp kơ̆l dêh char păng dôm bơngai joăt jang găh 4 grŭp tơdrong tơm, ‘noh đei hơmet ming hla ar bơ̆jang, gơh iŏk yua teh păng jên, tơplih kơsô̆ - tơplih ‘nao hơgei, kŭm hăm trong jang hơtŏk tơiung anih tĕch mơdro păng bơngai jang gơh hơgei.

Lơ̆m noh, gơh iŏk yua teh păng pơm hla ar tơmơ̆t jên jang ‘noh jĭ tơdrong đei lơ anih mơdro sa bơngơ̆t truh. Kiơ̆ kơ ƀok Nguyễn Huỳnh Vĩnh Huy, Kơdră vei lăng Khŭl mơdro sa sơnăm mơlôh dêh char Đắk Lắk, đơ̆ng rŏng kơ tơmơ̆t hơdai, tơring đei teh hơtŏk tơiung să hloh mă lei anih mơdro sa oei tơƀơ̆p mơmat mưh iŏk yua teh yua kơ trong jang tam mă hơmet pơ ‘lơ̆ng.

“Dôm anih mơdro sa dang ei đei 1,2 tơdrong jang tŏk bŏk kăl kơ teh tơhnă. Đơ̆ng rŏng kơ tơmơ̆t hơdai đơ̆ng 2 dêh char ‘noh teh oei lơ mă lei hrei ‘nâu tam mă đei trong jang trŏ lăp tơgŭm anih mơdro sa gơh iŏk yua teh đơ̆ng teh tơhnă ‘noh. Kơna jing kŭm răp gô khŭl kơdră teh đak, trung ương đei dôm trong jang tơgŭm ‘nao vă tơgŭm dôm anih mơdro sa”.

Dôm nơ̆r tơgop đơ̆ng anih mơdro hlôi đei kơdră chĕp kơ̆l dêh char păng dôm bơngai joăt jang pơma dơnuh, pơm rơđăh hloi tơ̆ hop akŏm. Dôm tơdrong ưh kơ gơh bơ̆jang tơ̆ tơring đei Khŭl pơgơ̆r jang chih akŏm vă apĭnh dôm anih tơm, anih jang Trung ương păng khŭl kơdră teh đak set hơlen, hơmet pơ ‘lơ̆ng.

Kiơ̆ kơ ƀok Đỗ Hữu Huy, Kơdră Anih vei lăng kon pơlei dêh char Đắk Lắk, đơ̆ng rŏng kơ tơmơ̆t hơdai, dêh char tŏk bŏk pơjing hơnih hơtŏk tơiung ‘nao hăm 3 tơring hơtŏk tơiung, 3 hơnih jang mŭk drăm păng 2 hơnih jang tưk tơiung; hơdrin jang tŏk GRDP jô̆ păh lăp jăl jang 2026-2030 iŏk đei đơ̆ng 11% tơ̆ kơpal, GRDP jô̆ păh lăp kơ̆l bơngai truh sơnăm 2030 đei hloh 153 triệu hlak jên.

“Nhôn ‘meh vă dôm anih mơdro sa, bơngai mơdro sa, mă loi ‘noh jĭ khŭl mơdro sa sơnăm mơlôh vang yak hơdai hăm dêh char. Đắk Lắk hrei ‘nâu ưh khan lăp đei tơmam đơ̆ng choh jang sa ‘lơ̆ng, tơring tơmam să, tơdrong ‘lơ̆ng joh ayŏ hơdrô̆, mă hlôi đei hơnih hơtŏk tơiung ‘nao, să. Vă năm hơtăih hloh, năm kơjăp hloh, bơ̆n kăl kơ đei dơ̆ng kơmăy kơmŏk vei lăng ‘lơ̆ng, jên jang păng tơdrong mơ̆t jang đơ̆ng rim anih mơdro sa tih vă pơm đei tơdrong kĕ jang hơtŏk tơiung ‘nao”.

Lơ̆m jơ năr pơgơ̆r tơdrong jang, Anih vei lăng kon pơlei dêh char Đắk Lắk păng Khŭl bơngai mơdro sa sơnăm mơlôh Việt Nam hlôi kĭ pơkăp hla ar chih tơƀlŏk jang hơdai găh pơtrŭt tơmơ̆t jên jang, tơgŭm anih mơdro sa păng hơtŏk tơiung khŭl mơdro sa lơ̆m tơring.