VOV4.Bahnar - ‘Năr brei (18/9), tơ̆ Hà Nội, Kơ dră Kuôk hô̆i Vương Đình Huệ pơ gơ̆r păng iung pơ ma tơ̆ Hop akŏm Mŭk drăm - Tơ pôl Việt Nam sơ năm 2022. Pơ ma pơ tôch tơ̆ Hop akŏm, Kơ dră kuôk hô̆i Vương Đình Huệ akhan, Hop akŏm hlôi sơ kơ̆t hơ dăh tơ drong hơ met ming, hơ tŏk ‘lơ̆ng mŭk drăm tih, hơ tŏk loi dơ̆ng tơ drong kĕ tơ jră pŭ păng jang tŏk kơ dih đơ̆ng mŭk drăm ling lang jing tơ drong tơm tih hloh.

Kơ dră Kuô̆k hô̆i vang truh Hop akŏm mŭk drăm, tơ pôl Việt Nam

Hop akŏm kŭm drơ̆ng nơ̆r kăl hơ nơ̆ng chih pơ keh trong jang tơ gŭm khôi luơ̆t, mă loi ‘noh jĭ ƀơ̆t măt ‘noh akŏm chih pơ keh trong jang khôi luơ̆t gah teh. Lăp đơ̆ng rŏng kơ pơ tôch Hop akŏm, Khŭl pơ gơ̆r hop akŏm gô pơ jing hla ar chih tơ roi tơ băt akŏm gơ̆ih truh Kuôk hô̆i, Khŭl kơ dră teh đak, dôm anih jang, anih tơm păng tơ ring vă pơ yua tơ tom ‘măng hop akŏm mă 4, Kuôk hô̆i jăl XV păng tơ drong jang tơ lĕch tơ drong kăl, bơ̆ jang kiơ̆ trong jang tơ gŭm hơ tŏk tơ iung mŭk drăm - tơ pôl kơ teh đak.

Thuem: Tơ blơ̆