Tổng Bí thư, Kơdră chĕp pơgơ̆r teh đak tơbăt, ‘măng dăr lăng hơlen ‘măng mă ou lăng kăl lơ̆m bơ̆ jang kang ƀô̆ păng tơdrong jang kiơ̆ rim tơdrong tơchơ̆t, trong bơ̆ jang đơ̆ng Trung ương, Hơnih tơm Chinh trĭ đơ̆ng blung sơnăm 2025 truh dang ei. Hơlen pơtôch bơ̆ jang hlôi tơƀôh hơdăh dôm tơdrong hơdrin đơ̆ng khul kơdră păng khul kang ƀô̆. Tổng Bí thư, Kơdră chĕp pơgơ̆r Teh đak Tô Lâm pơma hơdăh, teh đak yak mơ̆t lơ̆m jăl atŏk tơ iung ‘nao, athei pơm pơkeh tơdrong tơchơ̆t tĕnh koăng hloh, ‘lơ̆ng hơ iă hloh, trŏ lăp hăm yan ou. Kuô̆k hôi kăl sơđơ̆ng jang tơnăp, dăr lăng kơjăp, pơjing đei hloi tơplih ‘nao tơchăr, hơmet pơ ‘lơ̆ng tơdrong jang păng hơmet pơ ‘lơ̆ng dôm trong tơlĕch jang. Đơ̆ng pơtôch dăr lăng, lăng hơlen, Tổng Bí thư, Kơdră chĕp pơgơ̆r Teh đak athei Khul kơdră chĕp pơgơ̆r Đảng Kuô̆k hô̆i akŏm chĕp pơgơ̆r, pơrô̆ jang 6 tơdrong jang tơm. Kang ƀô̆ pơchoh trong tơ iung pơjing khôi luơ̆t, pơchoh trong trong bơ̆ jang teh đak kăl lăng kơjăp hloh dơ̆ng dôm tơdrong yan ou bơ̆ jang vei lăng tơring, choh jang sa, pơm tơlĕch, tĕch mơdro păng tơdrong hơrih sa kon pơlei.